MLA inthlana ZPM chhinchhiahna - Lukhum ; Sawhthing dah khâwlna tur an tifel tawh

Zoram Peoples' Movement (ZPM) Steering Committee vice chairman F Roding­liana chuan Inrinni khan Aizawl Press Club-ah thuthar thehdarhtute a kâwm a; kumin inthlanpuia ZPM chhinchhiahna (symbol) tur chu lukhum a nih thu a puang a, sawhthing dah khawmna tur an ngaih­tuah fel thu a sawi bawk.

F Rodingliana chuan, hmathlir fel tak neiin ZPM chu an inzam khawm tih sawiin, "Tunah pawh 'Sawhthing kg.-ah Rs. 50-in kan lei ang' kan ti a ni. Kan politician hlun pui puite leh mi thil intihre deuh

ṭhenkhatten 'An lei thei lo ang, pawisain a daih dawn em ni?' an lo ti a, kan budget cheng vbc. 9,670 mai bakah, GST return ringawt pawh hian kan sawhthing leina tur chu a daih lutuk. Fing âwm taka langte pawh hian an hrethiam lo tak tak nge, an tider zawk aw ka ti ṭhin. NLUP-ah pawh lêt leh tur awm miah loin cheng vbc. 4,800 chuang daih an tiral mai mai thei a, keini chu lêt leh tur a la awm a ni," a ti.

ZPM Vice Chairman chuan, sawhthing chu 'Lei pawh ni se, khawnge an dah zo zai ang' ti an awm thu sawiin, "Kan dahna tura lo buaite an awm a, lo buai suh se. Tunah hian sawhthing kan lei khawm sa kan dahna tur kan ruahman fel vek tawh a, tuna kan la buaina awmchhun chu, a man inhlan dan turah sum faiin nge, cheque-in tihah thutlukna kan la siam lo mai chauh zawk a ni. A chhan pawh official-te nena sawiho deuh a ngaih dawn vang a ni," a ti a; sawhthing chauh an buaipui dawn lo a, thlai dangte pawh Mizoram intodelhna turin an ngaituah dawn tih a sawi.

ZPM an sorkar chuan kum 5 chhungin Aizawl khawpuia traffic jam 55%-a tihziaawm dan tur ruahmanna an siam mek nia sawiin F Rodingliana chuan, "Aizawl traffic jam tihziaawmna atana kan ruahmanna chu open air escalator hmun pakuaah siam a ni. Entirna atan, Vaivakawn-Zarkawt, Bethlehem-Dakinpui, etc. Hei hi kan hman chuan lirthei ken chhuah ngai loin Aizawl hmun hrang hrangah kan kal thei dawn a ni," a ti; kawng pêngṭhuama lirthei intâwk khawm tam lutuk vanga traffic jam awm ṭhin tihreh dan turah mithiamte ráwnin ruahmanna an siam mek thu a sawi.

F Rodingliana chuan, kawlphetha leh kawng lama an hmalak an utm dan sawiin, "Tlawng lui (megawatt 54) leh Tuichang (102 MW)-ah kan insáwrbing dawn a, a bak chu kan sorkarin vai kutah a lo hlan tawh avangin hma a lak theih rih loh. Aizawl-Silchar four lane-a siam tura Prime Minister hnenah ZPM hruaitute'n an lo dil angin, December 2017 khan min phalsak a, tunah hian alignment thlak turin hma kan la mek. A chhuahna tur atan pawh Bawngkawn emaw Zemabawkah survey tih mek a ni," a ti.

ZPM Vice Chairman chuan, ZPM chuan mi an lawm lut ve vak vak lo tih sawiin, "Membership fee kan lak loh avang hian kan khingpuite hian tlem anga min lantir an tum ṭhin. ZPM hi kan tê lo; kan thawhho tirh khan ZNP hian unit 817 leh block 62 vel an nei a, MPC-in unit 192 leh block panga an nei bawk. An vote hmuh pawh 23.57% lai a ni,: a ti a; Zoram mipuite'n kalphung thara kal an châk tawh avangin ZPM an thláwp niin a sawi.

F Rodingliana chuan, ZPM-a tel pawl hrang hrangte'n an symbol an dahṭhain ZPM-ah an inchhûng khawm tih a sawi a, kumin MLA inthlana an symbol tur chu lukhum a ni tih puangin, "ZPM candidate zawng zawngte chuan symbol atan lukhum an hmang dawn a ni," a ti.