KHAWTHLIR

MPF meeting
Mizoram People Forum (MPF) Aizawl South-III Constituency Forum chuan October 27, Inrinni khan Sialsuk Kohhran Hall-ah General Meeting an nei a, MPF general secretary Rev.Dr R Lalbiakmawia leh hruaitu dangte'n an hmanpui. Inkhawmah hian MPF leh political party thawhhona thuthlung zirho a ni a; inthlanna thianghlim leh felfai a awm theih nan lungrual taka hmalak zel ni se an ti. An bial chhunga thawhhona thuthlung bawhchhiatna a thlen nawn tawh loh nan theihtawp chhuah an tum tih an tarlang bawk.

Veng fai lawm
Republic Vengthlang khawtlang chuan October 26, Zirtawp zan khan an YMA Hall-ah kumin 2018-a Aizawla veng fai bera thlan an nih an lawm a,; MJA aiawh, Sanitation Committee, YMA, MUP leh MHIP aiawhte'n thu sawiin, Sanitation Volunteer-te hnenah thilpek an hlan. Republic Vengthlang hian Aizawla veng fai lawmman ṭum nga an lo dawng tawh a ni.

Street Campaign
Mamit Bazar Veng Children Sanitation Club-te chuan Inrinni zing khan Mamit Bazarpuiah Street Campaign an buatsaih a, inthlana vote thlak pawimawhzia leh faina pawimawhzia thuziak hrang hrang kengin an puangzar. Campaign-ah hian club convener leh Bazar Veng MHIP president Laltharzeli'n thu a sawi. Campaign-a telte chu Mamit Bazarpuia bawlhhlawhte an thianfai nghal a ni.

UPC inkhawmpui
UPC Aizawl East District Missions department inkhawmpui lian vawi 25-na, October 26 Zirtawpni zana Muanna Veng UPC biak-ina neih chu nizan khan a ṭiak. Inkhawmpuiah hian thupui chu 'I rawngbawlna kha hlen rawh' tih a ni a, mi hrang hrangin an sawi. UPC Aizawl East District chhungah pastor bial 30 a awm a, bial tin aṭangin palai an kal thei a ni.