Vote thlak tura rualbanlote tihphûrna atan Aizawlah 'March With Pride' buatsaih a ni

November 28, 2018-a Mizo­ram inthlanpui neih tura inpuahchahna kal zelah October 27, Inrinni khan rualbanlote'n vote an thlak theihna atana cho phûr nan Aizawl DC office bultumin 'March with Pride' neih a ni a, Vanapa Hall kawt aṭangin chief electoral officer (CEO) SB Shashank-a'n a vai liam.

Sorkar thuchhuah tarlan danin, kumin inthlanah hian ṭum danga la tih ngai loh, pianphunga rualbanlote'n vote an thlak ngei theihna turin sorkar chuan ṭan a la nasa a, India khua leh tui, kum 18 tling chin apiangin vote an thlak ngei theihna turin infuih tharna leh inhrilhriatna programme eng emaw zat Systematic Voters’ Education & Electoral Participation (SVEEP) hnuaiah buatsaih a ni.

Rualbanlote electoral roll-a an awm leh awm loh endik a ngaih avangin Social Welfare department nena ṭangkawpin vote nei thei si, la nei lo an awm leh awm loh zawn chhuah hna thawh a ni.

Vote thlak ní, November 28-ah pianphunga rualbanlote'n vote an thlak theih nan an in aṭanga polling station thlenga hruai thei tur leh vote an thlak zawha an ina dah leh tur lirthei ruahmansak a ni dawn a; wheelchair leh zakdawh tiang hmanga an luh theih nan polling station tinah leilâwn (ramp) dah a ni ang.

Mitdel tan mitdel hawrawp (braille)-a ziah EPIC card siam turin hmalak mek a ni a, candidate an duh tak an vote theih nan electronic voting machine pawh an dapa an hriat mai theihna turin chhut pàwn a ni dawn bawk.