YMA-in kawng siam an enfiah

Sialkal Group YMA chuan thuchhuah siamin, Central YMA leh Mizoram PWD-in thawh dunna an ziah angin, October 27, Inrinni khan Sialkal Group YMA hruaitute'n Ngopa leh Mimbung inkar kawng siam mek an enfiah tih an tarlang a; chu Joint Inspection & Monitoring-ah chuan kawng enkawltu PWD SDO a tel lo tih sawiin, pawi an tih thu an puang.

Sialkal Group YMA tar­lan danin, YMA hruai­tute chu kawng siam hna thawktu com­pany-a engineering Malsawmkima'n lo dawng­sawngin, kawng siam mekah a nih phung tur, thil ṭul leh pawimawh hrang hrang a hrilhfiah a, an harsatna ṭhenkhatte a hrilh a; kawng chu No­vember 2018 tawp lamah Mimbung lam aṭangin blacktop hna ṭan theih a nih tur thu a sawi bawk.

Sialkal Group YMA hruaitute chuan, kawng chu kum 1995 vela BRTF-in an laih tlang leh an siam a ni a, chumi hnuah siamṭhat zui a nih tawh loh thu an sawi a; kawng siam hna thawk mektute chu a nih dan tur ang taka ṭha taka siam turin an chah a ni.