MJA leh Chin Unity Forum hruaitute inkâwm

Mizoram Journalists' Associa­tion (MJA) general headquarters hruaitute leh Chin Unity Forum (CUF) hruaitute chu October 23, 2018 zan khan Tahan, Myanmar-a Golden Butterfly Hotel-ah an inkâwm a, Mizo hnam pêng hrang hrangte inunauna atana thil pawimawh hrang hrang an sawiho.

Inkawmhona kaihruaitu MJA president Zonunsanga Khiangte chuan, MJA-in Zo hnahthlak hnam hrang hrangte inpumkhatna a ngai pawimawh hle tih sawiin, "Kum 2003-a Myanmar mi hnawhchhuah a thlen pawh khan MJA chuan pawisawi lote hnawhchhuah ṭha lo a tih thu a auchhuahpui a ni. In rilru kan hliam ang tih kan ring a, kan unaute rilru kan tih natnaah ngaihdam kan dil a; unau kan nih avanga inngeih taka awm hi kan duh dan a ni," a ti.

MJA President chuan, Zo hnahthlakte chu hnam tlemtê an ni tih sawiin, "Inelrél tham kan awm lo a, kan inpumkhat loh chuan hnam dangte'n min hmusit mai ang tih a hlauhawm a ni," a ti a; ruihhlo chungchangah Mizorama rawn kengluttu chu Myanmar lam mi an nih thu sawiin, a tihrêm kawngah ṭanho a pawimawh thu a sawi bawk.

Chin Unity Forum (CUF) president H Vanlalruata chuan, Myanmar-a Mizo awm zingah Hualngo leh Lusei an intihrang nia sawiin, a hûi khawm nan CUF chu an din tih a sawi a, "CUF hian Myanmar ram chhunga Zo hnahthlak hnam hrang hrangte lungrual taka kan ṭanho theih nan hma kan la mek a, kumin chhung ngeiin hnam hrang hrang aiawhte telna committee neih hman kan tum,," a ti.

CUF President chuan ruihhlo chungchangah, Mizo­ram aṭanga chahtu an awm ṭhin avangin kengtu an awm ṭhin nia an hriat thu sawiin, "A kengtu leh a chahtu hi inang tlanga hrem ni se, tun ai hian a ziaawm kan ring," a ti a; Police leh Excise zingah sum la ṭhin leh promotion nana hmang an awm nia an hriat avangin an rilru a nat thu a sawi.

Chin Unity Forum hruai­tute chuan, kum 2003-a Mizoram aṭanga Myanmar mi hnawhchhuah vanga an rilru ná chu a ziaawm tawh tih sawiin, Zoram mipuite chu a ṭha ṭha pek lêt ve tawh an duh tih an sawi a; Mizoram chu an innghahna a nih thu te, Zo hnahthlakte'n inpumkhatna kawng an zawh mek chu lawmawm an tih thute an sawi bawk.

MJA hruaitute hian October 23 vek khan tlaiah Khampat Bûngpui an tlawh a, Khampat Bûngpui Humhalhtu Committee president BH Khuma leh hruaitu dangte nen an inkâwm. BH Khuma chuan, tun hnai khan Khampat Bûngpui chu Chin Affairs Minister-in a tlawh a, a humhalhna atana hmalakna hmasa atan Kyat nuai 20 a pe tih a sawi.

BH Khuma chuan, Sagaing region chief minister Dr Myint Naing pawhin Khampat Bungpui chu sorkarin humhalh a tum thu leh a bula khawsa Káwl hote chu buaina siam lo tur leh an vanneihpui zawk tur thu a hrilh tih a sawi a; tun dinhmunah Khampat Bungpui humhalhna turah a bula khawsate aṭangin harsatna an tâwk tawh lo tih a sawi bawk.