Rahbi tharah Mizoram a chuan A hun tawh hle - ZPM Chairman
Aizawl South-I ZPM Block chuan Inrinni khan Republic Veng YMA Hall-ah Political Training cum Campaign Kick-off an buatsaih a; campaign hawngtu ZPM Steering Committee chairman Lalliansawta chuan, rahbi tharah Mizoram a chuan a hun tawh thu a sawi.
Lalliansawta chuan, Mizoram chu kil tinah zu leh ruihhloin a rûn thu sawiin, "Hei vang hian pastor leh upate'n mitthi vui tur an ngah ta hle. ZPM chuan sum thil tih theihna aiin ṭawngṭaina thil tih theihna a ring a, a hmachhuan zawk a ni. Sum sem loin ram leh hnam siamṭha turin sorkarna a siam theih. Sum sem loa sorkarna a siam theih tih hi mipuite'n kan ram leh hnam tan kan lantir a hun tawh hle," a ti.
Aizawl South-I biala ZPM candidate C Lalsawivunga chuan, Mizoramin tun hnaiah kum 30 chhung chief minister pahnih a hrawn tih sawiin, "Mahse, ram leh mipuite hmasawnna leh nghet taka ding tura hmasawnna kawng zawh aiin, party hamṭhatna lam buaipuiin an term an hmang zo zel. Mizoram hian ṭhalai thiamna leh theihna sang tak nei, chhawr tlak leh chhawr tur kan nei a, mahse sorkarin hmang ṭangkai loin an tha zawina turin a thlawna sem leh zu lam buaipui turin a hruai a ni," a ti a; ṭhalai leh nu leh pate chu ṭhalaite khawvel thar atana vote thlak turin a sáwm.
Inkhawm hi Aizawl South-I Block ZPM chairman Lalramnghaka'n a kaihruai a, ZPM star campaigner Vanneihtluanga pawhin thu sawiin, inkhawma telte political training a neihpui a ni.