Aizawlah MZP huaihawtin Zirlaite Ni hman a ni

Mizo Zirlai pawl (MZP) chuan nimin khan Zirlaite Ni leh MZP din chanpha vawi 83-na Vanapa Halla-ah an hmang a, Higher & Tech­nical Education joint director Ramhmangaiha Ralte khuallian a ni.

Inkhawm hi MZP vice president B Vanlal­tana'n a kaihruai a; Ram­hmangaiha Ralte chuan, khawvelah hmasawnna a thlen dawnin zirnain hma a hruai a ngai tih sawiin, "Kan pi leh pute kha káwla ni chhuak chhiara hna thawk ṭhin an ni a, sap missionary-te'n Mizoram an lo luh khan Pathian thu bakah ziak leh chhiar zirtirna an rawn keng a, a zir peih leh a thiam hmasa apiang kha Mizorama mi ràwn leh khawsak phungah pawh zah kai an ni," a ti.

Ramhmangaiha Ralte chuan, zirlait'en lehkha an zirlai aṭangin ram leh hnam hmangaihna an zir chhuak tur a ni tih sawiin, "Kan zir chhuak lo a nih chuan, mi hman tlak lo leh ram hmangaih nachang hre lo kan ni dawn tihna a ni," a ti a; Mizoramin hma a sawn theih nan zirnaah ṭhanharh a ngaih thu a sawi.

MZP president L Ram­dinliana Renthlei pawhin thu sawiin, Zirlaite Ni chu kum 2006 aṭanga MZP din champha, October 27-ah hman ṭhin a nih thu leh Zirlaite Ni chu sorkarin a puan tawh thu a sawi a, "Vawiina zirlaite hian naktuka zirlai lo awm turte tan mawh kan phur a, kan tu leh fate chenna tlak ram nuam hnutchhiah turin ṭan ila thar sauh sauh ang u," a ti. MZP chu kum 1935-a din a nih thu leh, Pathian hruainaa kum 83 a ding ta chu lawmawm a tih thu a sawi bawk.

MZP chuan an Rising Day leh Zirlaite Ni pual hian - Hmangaihte Rûn, TNT, Hermon Children’s Home, Mission for christ, Special Blind School, Synod Hospital, Gram Sabha, Aizawl Civil Hos­pi­tal, Bethany Children Home, Hmeichhe Ṭang­rual Pawl leh Motherless Babies Home-ahte ṭan­puina an pe a ni.