MPF duh dan zelin kan campaign ang - Lalduhoma

Zoram Peoples' Move­ment (ZPM) chief ministerial candi­date chuan nimin khan Khawzawl Zaingen Veng YMA Hall-a ZPM Tuichang block confe­rence a hmanpuinaah thu sawiin, ZPM an sorkar chuan Mizoram mipui, a bikin mi rethei zawk te'n ram leh hnam tana ding tlat sorkar an nei tih an hriat tur thu leh, MPF duh dan zela an campainge dawn thu a sawi.

Lalduhoma chuan, "ZPM hi kan sorkar ve leh miharsa leh ṭanpui ngaite Hand Holding Policy hmangin an bánah kaiin, mahni kea ding thei turin kan ṭanpui dawn. Sorkar thar chu a tak taka mirethei hmangiahtu leh ram leh hnam tana ding tlat a ni tih an hre tawh ang," a ti.

Mizorama sorkar ding tawh pahnihte'n inrêlbâwlna ngêlnghet atan leh ni tin khawsaka harsa zawkte tan hian ngaihtuahna tak tak an sêng lo nia sawiin Lalduhoma chuan, "ZPM chuan ram mipui leh kohhran duh ang taka election campaign kalpui leh Mizoram politics-a Pathian ram a thlen ngei theihna atante dik leh fel taka campaign zel hi kan tum dawn a ni," a ti a; a thlawna sem leh pek aiin, thawhrimna leh dikna nen ram leh hnam aa siam theih a, chu chu ram damna tur zawk a nih thu a sawi bawk.

ZPM hruaitu dan, Lalhmangaiha Sailo chuan, a pa Brig. T Sailo-in Khawzawlah hnathawh tam tak a lo neih tawh thu sawiin, "Ka pa hna la thawh zawh loh leh hmabak thawk puitling tur hian ZPM chuan hma a la dawn a, chu mi tihpuitlin anih theih nan chuan ZPM candidate W Chhuanawma hi lo vote tling ngei turin ka sawm che u a ni," a ti.

Tuichang biala ZPM candidate W Chhuanawma pawhin thu sawiin, ZPM CM Candidate chu mi tumruh a nih thu sawiin, "A lama ṭang hi eng anga tam nge an nih tih buaipui lo a, ram tan thil ṭha engzata tam nge ka tih, tihna thinlung a neih a avang hian ka ring tawk a, chuvanga zui chu ka ni," a ti a; Tuichang bialah hnutchhiah tlak lungphûm nei turin a ding a, chumi ti tur chuan thawhpui turin Tuichang bial mipui a sáwm a ni.