KHAWTHLIR

Hmeichhiate ngen
MHIP General Headquarters chuan thuchhuah siamin, hmeichhiate a tam thei ang ram rorelna sang zawk luhchilh tura an duh angin Mizoram inthlanpui awm turah political party sawi loin hmeichhe candidate awm apiangte an dinna hmun ṭheuhah an tlin an nih theih nan vote turin hmeichhia zawng zawng an ngen.

Champhaiah training
Nimin khan Champhai DC conference hall-ah MLA inthlan lo awm tura an district chhunga master trainer-te tan training buatsaih a ni. Master trainer-te hian November 1, 2018 hian Gandhi Memorial High School, Champhaiah polling party hrang hrang leh inthlan kaihhnawiha thawk chhuak turte thil pawimawh hrang hrang an zirtir chhâwng leh ang.

MNF-ah lawm lut
Mizo National Front (MNF) chuan thuchhuah siamin, All Mizoram Farmers Unikon (AMFU) general secretary Zion Lalremruata leh Congress hruaitu ṭhenkhatte'n MNF an zawm a, nimin khan Mizo Hnam Rûnah an lawm lut niin an tarlang. MNF-in an lawm luhte chu - Zion Lalremruata bakah Congress aṭangin - Communication member C Malsawmdawngliana, Executive member Remruata, organiser H Vanlalnuna, ADCC executive member Lalnunmawii te an ni.

Free clinic
Republic Veng Branch YMA chuan an Branch kum 60-na, diamond jubilee lawmna kal zelah nimin khan an veng community hall-ah a thlawna inentirna an buatsaih. Free clinic-ah hian mi eng emaw zat an inentir a, a mamawh ang damdawi-te a thlawnin an sem nghal a ni.

Pisa hawng
Ṭawi biala ding tur Mizoram BJP president Dr. JV Hluna chuan nimin khan Saitualah BJP pisa a hawng. Dr. JV Hluna chuan sorkarna chang tawh political party pahnihte aṭangin beisei tur a awm lo tih sawiin, "Keini central fachuam, tute party emaw anga zawm chawp tum ṭalh ni lo tan thil harsa tur a awm lo. Saitual district puitlinna atan pawh thil harsa tur a awm lo a, central hruaitute pawh hemi chungchangah hian ka titi pui tawh," a ti.