Chief Minister atan eirûk thubuai awrh nge, Kohhran Upa in duh zawk? - K Sapdanga

Zoram Peoples' Movement (ZPM) hruaitu K Sapdanga chuan nimin khan ZPM pisaah thu a sawi a; Chief Minister atan eirûk thubuai awrh mek nge, rawngbawltu kohhran upa an duh zawk tih Mizo mipui a zâwt.

Supreme Court-in thupek thar a siam tih sawiin K Sapdanga chuan, "Pawi khawih thubuai (criminal case) nei candidate chu television-ah leh chanchinbu lian berah vawi thum tal puanzar tura tih a ni," a ti a; an khingpuite chuan an hotu lu ber berte tihmualpho tumnaah ngaiin an thinphu a rang hle niin a sawi.

K Sapdanga huan, Supreme Court, criminal case leh anticipatory bail tihte sawi rîk apianga thin phu ve reng reng lo páwl an ni hlauh chu an vannei tak zet tih a sawi a, "Mizoram mipui hian Chief Minister atan eirûk thubuai awrh mek nge an duh, rawngbawltu Kohhran Upa, tih lo bûk ve turin Supreme Court hian zawhna a rawn siam a ni ta ber," a ti.

ZPM Leader chuan, tun hnaiah an khingpui pathum - Congress, MNF leh BJP-te chu MPF-te'n an lènchih tih sawiin, "Party tinte leh MPF-te thuthlung an bawhchhiat thu an hrilh a ni. An bawhchhiat kha MPF dan siam a ni lo a, MPF leh party tinte'n a huhoa an siam, hming an ziah hnan vek a ni. Mahni dan siam bawhchhe lo awmchhun páwl kan ni zel hi a vanneihthlak a, a puitling zia a ni. Mahni dan bawhchhiat hi pawl dangte angin kan inhmeh ve lo," a ti a; an candidate leh party worker zawng zawngte chu MPF nena thawhhona thuthlung hre thar leh turin a chah.

Campaign-in a vàwrtàwp a thlen mek thu sawiin K Sapdanga chuan, "Ṭawngkam hriam leh ngeiawm taka inbeihnate pawh kan tâwk mek a, kan la tawk dawn chauh. A hen tâwka han chhan lêt chakawm tak takte pawh a awm ṭhin. Mahse, 'Phuba reng reng chu keima lak tur a ni' tih thu petu hi kan ring ngam tur a ni. Sawichhiatna kan tawh nasat pawhin 'tharum' ni lo 'tha' in kan chhang let ang a, thawh rim phah nan hman tur a ni. Mipuite'n rorelna ṭha an beisei hi keimahni hmangin Pathianin a takah a chantir ngei ang tih i ring ngam ang u," a ti.