Political party-te thusawi hun tur pawt

Election Commission of India (ECI)-in a phal angin, political party-te chu sorkar media pahnih - All India Radio leh Doordarshan Kendra kaltlangin mipuite hnenah thu sawina hun siamsak a ni dawn a; Election Telecast 2018 atana political party hrang hrangte'n AIR leh DDK-a hun an hman tur ní leh hun chu nimin khan additional chief election officer (CEO) Lalzarmawii hoin a pisaah pawh a ni.

Lalzarmawii chuan, AIR leh DDK kaltlanga Election Telecast buatsaih chu kum 1998 Lok Sabha inthlan aṭanga tih ṭan a nih thu sawiin, "Khami kum vek khan state election-ah pawh hman phal nghal a ni. National leh recognised party-te tan minute 15 hun pek a ni a, a dangte erawh chu minute 11 te, minute 8 leh minute 5-tein sem a ni," a ti.

Addl. CEO chuan, Election Telecast-a thu sawi turte chu a hmain thehluh a ngai vek dawn tih sawiin, "Mipui ngaihthlak atan a him tawk em tih endiktu tur committee din a ni ang," a ti a; political party-te'n an thusawiah ram dang sawichhiatna lam te, sakhua emaw hnam insawichhiatsak lam te, khawtlang leh ram chhungah innghirnghona tichhuak thei te, Court hmuhsitna te, ram inpumkhatna tichhe zawngte emaw mimal tu emaw hmingchhiat khawpa a chanchin duhawm lo an sawi khap a nih thu a sawi.

Election Telecast-a political party hrang hrangte thusawi hi November 9-26, 2018 inkarah tihchhuah vek tura tih a ni.