NPP ding hi BJP-in an tuar ber - NPP General Secretary

National Peoples' Party (NPP) hruaitute chuan nimin khan Aizawl Press Club-ah thuthar thehdarhtute an kâwm a; Mizoram NPP general secretary Dr Lalrina Jahau chuan, Mizorama NPP a ding chu BJP-in an tawrh ber thu a sawi.

Dr Lalrina Jahau chuan, hmarchhak biala political party zingah NPP chiah BJP thunun thei an nia sawiin, "Manipur leh Nagaland-ah BJP hi kan tel loin an sorkar thei lo. Kan duh loh zawnga an kal chuan kan thawhpuina hi kan sût ang. Mizoram NPP din a ni pawh hi a tuar ber tur chu BJP an ni a, thawkho ila an tawrh kan phal lo ang," a ti.

NPP General Secretary chuan, national party zingah NPP tih loh chu hmarchhak state-te ṭhatna tur tak tak duhtu an awm lo nia sawiin, "Hmarchhak state-te hi kan ṭanho a ngai tih hi kan ngaihdan a ni," a ti a; sorkar laipuiin hmarchhak bial a ngaih pawimawh zawk theihna atan tribal-te an ṭanrual a pawimawh thu a sawi.

NPP hotute chuan, BJP sorkarin Good Friday ní tak Digital India leh Krismas ni Good Governance Day atana an puan ṭuma MP zinga dodaltu awm chhun chu NPP president Conrad Sangma a nih thu sawiin, "President leh Prime Minister hnenah a duh loh thu a thlen a ni. Chuvangin, NPP leh BJP hi tum leh duh thuhmun kan nih lohzia a lang," a ti.

Tribal awmnaah chuan candidate an neih zel dawn thu sawiin NPP hruaitute chuan, "Rin phak bâkin NPP hi ṭhalaiin an lâwm a, kan party ticket-a din min díl pawh an tam," an ti a; an candidate turte chu hun remchangah an puan dawn thu an sawi.

Thuthar thehdarhtute kawmna hun hi Mizoram NPP convener Lianzuala'n a kaihruai a, Mizoram BJP vice president B Suanzalang chuan, BJP-ah candidate a chan loh avangin NPP a zawm thu a puang.