CYMA leh MNF hruaitute an inkâwm Inthlanah hel inrawlh kan duh lo - Zorama

Central YMA office bearer (OB)-te chu nimin khan MNF party pisa, Mizo Hnam Rûnah an lêng a, MNF hruaitute chu inthlanna dik leh thianghlim a awm theihna atana thawhpuiah an sáwm. MNF president Zoramthanga chuan, MNF-in inthlanah hel an inrawlh an duh ngai lo niin a sawi.

CYMA hruaitute hi MNF chuan an president Zoramthanga hoin an lo dawng­sawng a; CYMA president Vanlalruata chuan, MPF awm hmain CYMA-in inthlanna dik leh thianghlim a awm theihna atan hma an la tawh tih sawiin, "Mipuite'n lungmuang taka vote an thlak theih hi kan duh ber a, chumi atan chuan hma kan la, Manipur-ah hel biatein kan kal hial tawh a ni. Thil dang dangah induhkhawp lohna awm mah se, kan inthlan dan a ṭha thawkhat a, ṭha zual zel se kan duh," a ti.

CYMA President chuan, tun hnaiah Bru Revolutionary Army inti, Zarzokima thah a nih ṭuma an hotupa chuan Chhimluangah vantlang inkhawm koin, Bru-te chu MNF vote turin a hrilh tih sawiin, "Hmar tlangdungah pawh telephone hmanga helte aṭanga MNF vote tura inhriattirna a awm niin kan hria. In hriatpui lo pawhin an ti thei a, in hriatpui mai thei. Hmehmih theih a nih laiin i hmetmit ang u. Boruak ṭha tak hnuaia inthlan kan neih theihna atan i ṭangho ang u," a ti a; mipuite thinthia an awm lohna thil a thlen an duh loh thu a sawi.

Bru chungchangah Vanlalruata chuan, "Tripura transit camp-a Tuikukte hi chhuan­lam chhe tak tak siamin an rawn lêt duh lo a, kum 20 chuang Mizoram electoral roll-ah an bet tawh. Political party ang záwnga puihna awm lo se kan duh. Kan ṭan tlan a ngai a, a nih loh chuan kan ṭhenawm state-te ang mai kan ni ang tih a hlauhawm," a ti.

CYMA vice president R Lalngheta chuan, Mizoram sorkarin inremna a siampui loh zawk HPC(D)-te an inhâm puar mek tih sawiin, "Inthlana hel inrawlh hi kan ngaimawh. Hel hi chu engti zawng mahin Mizoram inthlanah inrawlh lo se tih hi kan duh dan a ni. Sorkar loh hlauh luatah thil kan bawh huam huam ang tih a hlauhawm," a ti a; tu pawh sorkar se, ram leh hnam tana thawh tlan CYMA-in a duh thu a sawi.

CYMA general secretary Lalhmachhuana chuan, tunlai hian district pek leh pek loh a lâr hle tih sawiin, "In manifesto-ah district deve­lopment council leh village development coun­cil tih hmasawn lam zawng a chuang a, hengte hi in ti a nih pawhin, a hnam bil ang zawngin ti lo ula YMA chuan kan duh a ni," a ti.

Lalhmachhuana chuan, khaw chhak aṭanga ruihhlo tawlhin Mizoram a rûn nasa tih sawiin, "Zu pawhin mihring leh chhungkua a tichhia a ni. Chumi ang tho chuan khaw chhak aṭanga ruihhlo rawn tawlh thlain min rûn nasa. Sorkarna in chan a, MLCP Act in titawp a nih pawhin, ruihhlo dona thlahthlam lo a, ramri âwng chungchangahte ṭan lak a ngai hle," a ti a; ruihhlo do chungchanga an hmalak dan tur MNF hruaitute a zawt a ni.

CYMA hruaitute chuan, Tripura relief camp-a Bru-te RSS hoin an ko khawm tih sawiin, "BJP an chak theihna turah chuan BJP vote a, an chak theih lohna turah chuan MNF vote mai turin an ti niin kan hria. Hei hi a chhan chu NEDA-ah MNF an tel vang a ni. Inthlana thawkho si loin, inthlan zawhah BJP in thawhhopui leh mai hlauhthawnnate a awm," an ti a; Chakma candidate siam chungchangah YMA chu an dinna ngai renga an la din thu an sawi.

MNF president Zoramthanga chuan, an rammut lai pawhin MNF president Laldenga'n candidate an neih theih lohna inthlanah inrawlh a duh ngai lo tih sawiin, "Kha'ng hun lai khan Mizoramah candidate kan neih theih loh avangin inthlanah kan inrawlh ngai lo. Manipur hel inzawmkhawm pawl UPF-te sorkar laipui nen ka inbiaktir pawhin ka hrilh fo chu, candidate an neih theih lohna inthlana inrawlh loh tur tih a ni a, an zâwm ṭha hlein ka hria," a ti.

Mizoram inthlanah hel an inrawlh lohna atan theihtawp chhuah a duh nia sawiin Zoramthanga chuan, "Sorkar nena inrem ve lo HPC(D)-in Mizoram an rawn hnaih a, aw an la nei lo. Engtin nge kan tih ang aw tih ngaihtuah a, ṭanrual a, an inrawlh loh dan tur ngaihtuah ṭha ka ti," a ti a; hel pawlte'n MNF party an ṭan a duh loh thu leh party dang an ṭan pawh a duh loh thu a sawi.

MNF President chuan, Chhimluang khuaa Bru Revolutionary Army intiin vantlang inkhawm a koh thu CYMA-te'n an sawi chungchangah, "Assam-a Tuikuk underground-te an rawn inzuar ṭhin a, rawn inrawlh lo turin kan ti. An pawisa duh hian public meeting an rawn ti ve ngawt thei. Ṭha kan ti lo hrim hrim a, na takin kan ṭang ang. Hemi chungchang hi kan hriatpui lo hrim hrim," a ti.

BRA chungchangah hian MNF Election Directorate vice chairman K Vanlalauva chuan MNF block hruaitute nen an inbiak thu sawiin, "An hriat dan chuan Aizawl

aṭangin Bru Welfare inti an lo chhuk a, an inko khawm a, inthlan lehah chuan MNF vote vek tur kan ti deuh a ni a, an ti e, an ti. Keini lam aiin police-in an hre hmasa a, an intir vat a, a sawitute tam tak an haw leh vek tawh a ni," a ti a; CID lam pawhin report mumal an nei lo nia an hriat thu a sawi.

Zoramthanga chuan, Chakma candidate neih chungchangah, "Party dangin candidate an neih loh chuan kan nei lo ang tih hi kan ngaihdan ngai reng a ni. Party dangin an tih chuan kan ti ve lo thei lo. Miin penalty an pet laia goal veng neih ve lohte chu thil tih chi a ni bik lo. Mi dangah an candidate dah an sût leh a nih chuan candidate dah lo hmasa ber kan ni ang," a ti.

BJP nen an thawkho dawn lo nia sawiin Zorama chuan, "BJP chuan thawhho an duh em em a, kan experience aṭangin mahnia din hi ṭha kan ti a, thawhpui neih kan tum lo. BJP hi an tê ve si a, tlin an inring si lo, inham puar dan zawngin kan hmingte an lam a ni thei. Suma inlei tlin an tum an ti a, an thei dawn lo hrim hrim," a ti a; inthlanah emaw, inthlan zawha thawhho chungchang BJP hruaitute nen an sawi ngai lo niin a sawi.

MNF President chuan, sorkarna an chang a nih chuan ruihhlo lo lut tur ven kawngah theihtawp chhuah an tum tih sawiin, "Kan sorkar chuan Burma-ah ṭum ka tum a, an sorkar ṭan ka laktir ang. Zo hnahthlakteah kohhran leh NGO kaltlangin, ruihhlo tawlh lo tura ngenna siamin, a ti lui chu Mizoramah pawh dim an nih loh tur thu kan pu darh ang. Ruihhlo bâwiha táng tawhte enkawlna atan home-te tihchangtlun an nih bakah, patient treatment tihna hmun lian tak kohhran leh NGO nen ṭang tlangin Seṭhawnah kan din ang, a ṭul angin sikul, doctor-te pawh dah a ni ang," a ti.