Inthlan atan inbuatsaih
November 28, 2018-a Mizoram Legislative Assembly inthlanpui awm tur atan Mizoram hmun hrang hrangah inbuatsaihna kalpui mek a ni.
Siahaah chuan nimin khan Siaha Higher Secondary School leh Siaha Middle School-ah polling official 413 leh sector magistrate 15-te tan training buatsaih a ni a, an mawhphurhna leh thil pawimawh hrang hrang inhrilhfiah a ni.
Champhaiah chuan DC conference hall-ah political party-te pualin nomination paper, affidavit leh thil ṭul dangte tih dan zirna buatsaih a ni a; returning officer Ethel Rothangpuii chuan, inthlan kaihhnawih thil thar a awm ṭhin avangin inzir reng a ngaih thu sawiin, political party-te chu inthlanna dik leh muanawm tak a awm theih nana thawhpuiah a sáwm.
Mamitah chuan nimin khan district bawrhsap Vanlalngaihsaka hoin a pisaah inthlana mawhphurhna hrang hrang chelhtute pualin an mawhphurhna leh chanvote inhrilhfiahna hun hman a ni.
DC Vanlalngaihsaka chuan, training-a telte chu inthlanpui awm turah Mamit district chhung mipui, India khua leh tui, vote nei zawng zawngte'n an chhia leh ṭha hriatna hmanga ngaihtuahna fim tak nen, an duh thlanna hmanga zalen taka vote an thlak theih nan inthlan chhunga mawhphurhna leh chanvo hrang hrang neitute chu ṭha taka an mawhphurhna leh chanvote hlen chhuak turin a chah.