Police-in inthlan atana hmalak dan an puang CAPF leh SAP company 15 rawn thleng tawh

Mizoram Police chuan thuchhuah siamin, Mizoram mipui leh Tripura-a awm mek Mizoram Bru-te'n thlamuang taka Mizorama vote an thlak theih nan Mizoram Police-in hma an lak mek zel thu an puang a; Mizoram inthlana duty tur Mizoram páwn aṭangin Central Armed Police Force (CAPF) leh State Armed Police (SAP) company 15 rawn thleng tawh tih an tarlang.

Mizoram Police thuchhuah chuan, "Mizoramah thlamuang tak leh thianghlim taka MLA inthlanpui kan neih theihna tur leh Bru relief camp-a awm mekte'n Mizorama thlamuang taka vote an thlak theihna turin nasa takin Mizoram Police-te'n ṭan an la mek a, a bikin Bru-te awm tamna district - Mamit, Kolasib leh Lungleiahte venhimna leh ruahmanna uluk taka kalpui a ni," a ti.

Bru-te chenna leh hruai kîrna hmun leh khuate chu police officer-te'n ngun taka vilin an tlawh reng tih sawiin Police thuchhuah chuan, "An harsatnate leh mamawhte enin an ngaihthlaksak a, rálmuang tak leh lungmuang taka vote an thlak theih nan boruak ṭha siam zel a ni," a ti a; inthlana venhim hna thawk tur sipai (force) rawn kal tur - Central Armed Police Force (CAPF) leh State Armed Police (SAP)-te chu nimin khan Mizoramah an thleng ṭan tih sawiin, chungte nen chuan Mizoram Police-te'n venhim ngai lai hmun (vulnerable area)-ahte patrolling an neih dawn thu a tarlang.

Mizoram inthlana duty tur sipai/police force-te hi Mizoram police leh magistrate-te nen an thawkho dawn a; inthlana sum hmanna endik (expenditure monitoring) te, thil duhawmlo leh ṭha lo dap chhuah hnate an thawh dawn bakah, flying squad, static surveillance teams, quick response team, sector police leh nakas (check-post)-ahte hman an ni ang.

Mizoram Police chuan, mipuite chu police-te thláwp leh ṭanpui turin an ngen a, "Dan anga kan hmalaknaah fimkhur taka leh mipui harsatna siam lo thei ang bera hna thawk turin kan infuih reng a. Kumina inthlanpui kan hmachhawn turah vote nei zawng zawngte'n lungmuang leh dik taka vote an thlak ṭheuh theih nan hma i la zel ang u," an ti.

Police thuchhuah point ṭhenkhat
1. Mamit district-ah tun hnaia Bru repatriation-ah khan chhungkaw 11-a member 67-te Mamit district-a khaw pathum - Sihthiang, Bawrai leh Búngṭhuamahte an inbéngbel a, police pawhin security ṭha taka pein an vil reng a ni. Heng khuate hi police officer-ten tlawhin an kan ṭhin. Bru chenna khaw dangte pawh uluk taka vil niin, an harsatnate ngaihthlaksakin thlamuan reng an ni. West Bunghmun leh Tumpangluiahte 28.10.2018 khan Border Outpost (BOP) thar hawn a ni a, 4th. IR Bn., Luangpawla mite'n an enkawl nghal.
2. Kolasib district-ah tun hnaia Bru repatriation-ah chhungkaw pahniha member 10-te lo lutin, 28.8.2018 khan Meidum leh Zodin (Rasdali)-ah dah an ni a, police venhimna leh enkawlnain thlamuang takin an cheng mek. Bru chhungkuate chenna hmunte hi Kolasib leh Bairabi police station aṭangtein tlawh ṭhin a ni. Zophai, Pangbalkawn, Bukvannei, N.Thinglian, South Chhimluang, Saihapui-K, Dilzau leh Hortoki-te hi venhim ngai bik, vulnerable area an nih avangin ngaih pawimawh an ni a, patrolling leh venhimna hrang hrang hmanga vil reng an ni. Bukvannei khuaah 29.10.2018 khan police BOP thar hawn a ni a, 1st. IR Bn., Mualvumte'n an enkawl mek.
3. Lunglei district-ah Bru repatriation hnuhnung berah chhungkaw 20-a member 86 chu Dinthar leh Putlungasih khuaah an inbéngbel a, police venhimna leh enkawlna pek niin, ngun taka vil leh tlawh reng an ni a, an harsatnate leh mamawhte a theih anga en zui zel a ni. Tlabung SDPO leh Tlabung, Lungsen leh Bunghmun PS OC-te'n an area ṭheuha Bru khuate an tlawh reng a, thlamuang taka vote an thlak theihna tura hmalak zel a ni. Tun hnaiah police officer (inspector) chu Lunglei DEO-in officer a ruatte nen Tripura-a Bru camp-te tlawh a, Bru voter-te'n lungmuang taka Mizorama vote an lo thlak theihna turin hma an la ang.
4. Tun ṭum Mizoram inthlanpuiah hian Central Armed Police Force (CAPF) leh State Armed Police (SAP)-te 29.10.2018 aṭangin lak luh ṭan a ni a, a hmasa (first phase) atan company 15 (mi 1500 báwr) chu district pariata duty turin an lo thleng ṭan. Lo thleng tawhte chu:
i) Assam SAP (AP Bn.& IR Bn.) company 10: Aizawl district tan company 3, Mamit & Champhai tan company 2 ve ve, Kolasib,
Serchhip & Siaha district tan company 1 ṭheuh.
ii) 438 Bn. BSF company 3: Aizawl, Lunglei leh Kolasib district tan company khat ṭheuh.
iii) CRPF company 2: Mamit & Lawngtlai district tan company khat ve ve.