Mizoram inthlanpui awm turah kohhran Zahawmna bûkin a awm dawn - Duhoma

Tuikum bial chhung, Chhiahtlang khuaa Zoram Peoples' Movement (ZPM) campaign office chu nimin khan ZPM chief ministerial candidate Lalduhoma'n a hawng a; Lalduh­oma chuan, Mizoram inthlanpui awm turah kohhran zahawmna bûkin a awm dawn tih a sawi.

Lalduhoma chuan, Mizo mipuite'n kohhran aw chu Pathian­ aw a ni an tih pawh zah zo loin Congress kaihhruai sor­karin zu an zuar tih sawiin, "Kan ram in thlanpui lo awm turah hian kohhran zahawmna bûkin a awm dawn. Kohhranin nasa takin a do tih kan hre tlang vek. Heti chunga Congress hi kan la thlang tling duh a nih chuan, kan Pathian taksa, kohhran zah­awmna hi kan tibawrhbáng dawn tihna a ni. Kohhran aw hi Pathian aw kan lo tih ṭhin pawh nuaiboin a awm dawn a ni," a ti.

Mizoram lo kaihhruai tawhtu party pahnih MNF leh Congress-te chuan ram an kaihhruai dan a dik loh avangin Mizoramah rethei leh hausa inkar a zauh tial tial tih sawiin Duhoma chuan, "Mizoram hi mi hausa hnuaiah a kûn lut ṭan mek a ni," a ti a; Mizo mipui, Kristian ni tawh phawt chu kohhran zahawmna tichhetu ni lo tura sawmin, Mizo sakhaw zah­awmna humhim a nih theih nan ṭang-rual pawl pui turin a ngen a ni.

Lalduhoma chuan, MNF chu BJP nena thawk dun an ni tih sawiin, "Hnam party inti chunga Chakma MLA candidate nei ṭhin an ni. Kan hnam leh sakhua a him zel theih nan MNF pawh hi kan hnâwl ngam an ngai," a ti a; Mizoram hruaitute'n Pathian duh dana ram an kaihhruai loh avangin Mizoram leibá a ngah phah hle niin a sawi bawk.

Inkhawmah hian Tuikum biala ZPM candidate PC Vanlalruata pawhin thu a sawi a ni.