Management pawl thar ZOMA din a ni

Management lama Mizoram leh Mizote'n hma an sawn theihna atana hma latu tur pawl, Zoram Management Association (ZOMA) a ding thar a; an hruaitute'n nimin khan Aizawl Press Club-ah thuthar thehdarhtute kâwmin, an pawl din chhan leh hmalak dan turte an puang.

ZOMA president RL Rinawma chuan, an pawl din thar chu management (master degree) zir chhuakte din a ni tih sawiin, "Mizo zingah management zir chhuak ṭhahnem tak an awm ve ta a, keimahni intihsâwt tawnna bakah, khawtlang leh ramah ṭangkai taka thawh kan neih ve ringin inhlawm khawmna pawl neih ve a hun niin kan hria a, ZOMA hi a lo piang ta a, sowrkar dan angin society anga ziah luh tawh a ni," a ti.

RL Rinawma chuan, ZOMA chuan sorkarah thil phut emaw, nawr emaw an nei ngai dawn lo tih sawiin, management leh a zirna lamin hma a sawn theihna atan te, management lama Mizo ṭhalaite kawng kawhhmuh tur te, sorkar, mimal, institution hrang hrang atana remhriatna thawhtu nihte an tum thu a sawi.

ZOMA President chuan, Mizo zinga management lam mithiamte kaltlanga Mizoram leh Mizote hmasawn tumna lam hawia hruai theitu nih an duh thu sawiin, "Kan ngaihtuahna leh thil thlirna hmasawn zawnga hertir thei nih kan duh hle. He pawl kaltlanga ram leh mipuite, sorkar tiamin ngaihtuahna leh kal­phung ṭha rawtna chhawptu nih kan duh hle a ni," a ti a; All India Management Association la zawm an tum tur thu a sawi bawk.

ZOMA hruaitu office bearer dangte chu - vice president Lal­rochuanga Pachuau, secertary Rinzuala, assistant secretary H Zorempuia leh treasurer Evangeline Zothansangi Hmar te an ni.

ZOMA member ni theite
1. Mizoram chhung leh páwna awm Mizote
2. Zirna subject peng lian tak, Management Studies university emaw, management institute recognized ngeia zir chhuak, master degree leh a tlukpui dawngte
3. Mizo ni kher lo, a chunga tarlan tak thiamna nei, Mizorama khawsa mek emaw, hna thawk mekte
4. Mizorama chêng, thiamna sang tarlan degree nei kher lo pawh, India ram emaw, khawvel ram dangah pawh management practice thiam leh entrepreneur ṭha leh hlawhtling an nihna vantlang hriatpui leh chutianga mite pawhin an pawmte