Kolasib MJA-in Lalremsiami an chawimawi

Mizoram Journalist Association (MJA), Kolasib district chuan nimin khan Kolasib Press Club-ah Indian hockey player Lalremsiami Hmar chawimawina leh kawmna hun an hmang.

Chawimawina inkhawm hi Kolasib MJA vice president Andrew VL Auva'n a kaihruai a, president R Lalhmingthanga'n Kolasib MJA hmingin chawimawina thuchei a hlan. R Lalhmingthanga chuan, Lalremsiami tih leh thawhrimna, tumruhna leh taimakna tih a inhmeh hle nia sawiin, Mizo mipui leh ṭhalaite'n an entawn ber tur a nih thu a sawi a, "Mizo tawh phawt chuan Remsiami hi kan ngaihven vek a, hmabak êng tak a neih hi hlawhtling taka hmang chhunzawm turin duhsakna kan hlan a ni," a ti.

Lalremsiami Hmar chuan, Kolasib leh Mizoram mipuite'n ropui taka an chawimawi avangin lawm­thu a sawi a; India team-a an captain Rani Rampal pawhin a pa ngei biaiin, Mizoramah kal ve a châk thu a rawn hrilh tih a sawi.

Lalremsiami nu, Lalzarmawii pawhin thu sawiin, an fanu leh an chhungkuain malsawmna an dawn chu Pathian vang a nih thu a sawi a, "Kan la tawn ngai loh chawimawina tam tak kan dawng a, Kolasib leh Mizoram mipuite'n thilpek tam tak min pek avang te, duhsakna zawng zawng min hlan avangin lawmthu kan sawi tak zet zet a ni," a ti.

Lalremsiami hi November 4, 2018-ah India hockey team zawm turin Bengaluru a pan dawn a, kum 2020-a Olympic awm tur atan an inbuatsaih nghal dawn a ni.