Lungleiah municipal council kan pe dawn - Lalruatkima, MNF

MNF party MLA ni lai leh Aizawl West-II biala an candidate Lalruatkima chuan nimin khan Lunglei Farm Veng community hall-ah MNF Lunglei East Block-I conference a hmanpuinaah thu sawiin, MNF an sorkar chuan Lungleiah khawpui enkawlna municipal council an pek dawn thu a sawi.

Lalruatkima chuan, August 2, 2016-a UDPA Minister-in Aizawla AMRUT Scheme a hawnnaah, Mizoram sorkarin district danga municipal din tura ngaihtuahna a sên mek thu leh Planning leh Finance department nen inrâwn mek a nih thu a sawi tih a sawi a, "Chief Minister-in Lungleia municipal council din turin Mizoram sorkar a inpeih tawh tih a nih laiin, tun thlengin Lungleiah municipal hmuh tur a la awm lo. Lungleiah municipal council kan pe dawn a, district headquarters hrang hrangah pawh kan pe dawn," a ti.

Aizawl-Lunglei kawng chu a chhe hle nia sawiin Lalruatkima chuan, MNF sorkarah chuan Aizawl-Lunglei chu darkar 4 chhunga thlen theiha siam a nih dawn thu a sawi a, "Mi ramah chuan sumin kawng an siam a, Congress sorkarah chuan kawngin sum an siam a ni. MNF sorkarah chuan kawng chhia vanga Zoram mangchhia tihbo a ni ang," a ti. MNF sorkarah langtlang sorkar a piang dawn thu leh, hna thawktute chu hlêp tamah ni loin, hna thawh ṭhatah an inel tur thu a sawi bawk.