MPCC-te sorkar ngei turah an inngai

Congress party chuan thu­chhuah siamin, kumina Mizoram inthlanpuiah Congress party-in a zawna a vawi thumna atan sorkarna an siam leh ngei dawn niin an tarlang.

MPCC thuchhuah chuan, "Mi­zoram hmun hrang hrang leh Aizawl khawpui chhung block hrang hrang aṭanga report lo lutte a zir chian hnuin, kumin MLA inthlanpui kan hmachhawn turah hian a vawi thumna atan Congress party chuan sorkarna a siam leh ngei dawn a ni tih a puang a. Hmun hrang hrangah party mipui an phûrin, sorkar siam leh thei tura an thawhrim rah kan hmu thuai dawn a ni," a ti.

Congress party aṭanga eptu party lama lut thâwm awm ṭhin chungchangah MPCC chuan, "A nihna takah chuan heng mite hi hun rei tak aṭang tawha party chhung­kaw boruak pawh hre ngai lo, a phawvuaka party hrang hranga thên kual mai mai ṭhin an ni a, hetiang ho lawm luh thu theh­darh vak vak hi boruak lian tak nei anga inlantir tumna 'publicity wave’ a ni," an ti a, belh chian a dâwl loh zia chu a làwm luttute'n an hre chiang niin an sawi.

Congress party candidate-te'n hmun hrang hranga inkhawm leh campaign hawnna an neihnaah mipui an kal ṭha ṭhin hle nia sawiin MPCC chuan, "Party mipui an kal ṭha a, mipui a mak a maka tam hmuh tur an awm zel a ni. Hengte hian sorkarna siam tura party mipui lungrualzia a entir. TV lamah hetiang party mipui pungkhawm thlalakte hi hmuh tur awm rih lo mah se, mit ngeia hmutu neutral mipui hi Congress party chakzia hre chiangtute an ni," an ti.