MNF sorkar lâk luhnaah khan Abu Mazumdar sàwm a ni - Vanlalhlana
ZPM Legislature Party (ZLP) deputy leader Vanlalhlana chuan, December 15, 2018-a MNF sorkar lak luhnaa tel turin Assam sorkarin smuggler a zawn mek Abu Mazumdar chu sàwm a nih thu a sawi.
Nimina Assembly session-ah 2022-23 Mizoram budget a tlangpuia sawihonaah Vanlalhlana chuan, November 25, 2021-a Delhi Assam House-a zanriah kîlhonaah Abu Mazumdar a tel ve tih sawiin, "Smuggler a ni a, Assam-ah wanted a ni a, a bo a, an zawng reng a ni. Chu chu kan hmelhriat em? Kan sáwm lo ka ti nã a, he Mizoram sorkar lo pian tirha swearing in-ah khan invitee zingah, sàwm zingah a tel a ni. Dinner-ah khan tel turin kan sáwm lo kan ti nã a, kan hmelhriat deuh a ni lo maw?," a ti a; thil nihna sawi chiang turin House leader Zoramthanga a ngen a ni.
Vanlalhlana chuan, tunlaiin Kamrul-a a lâr hle tih sawiin, zirlai pawl, YMA leh contractor-te'n an buaipui viau bakah, CM press conference-ah sawi lan a ni tih a sawi a, "Kamrul-a hian kum hnih chhungin cheng vbc. 88.15 hû a thawk. A dang leh chu Zoramchhana niin, chu chuan kum hnih chhungin vbc. 74.76 a hmu a, chu chu kan CM unaupa fapa niin an sawi," a ti a; Kamrul-a chu tribal certificate nei lo se chuan, income tax cheng vbc. 26 pe tur a nih thu a sawi.