MNF-in Mizo National Day an hmang

Nimin March 1 kha MNF-in kum 1966-a inde­pendence an puan champha a ni a, Mizo National Day tia vuah zuiin, Aizawl leh hmun dang ṭhenkhatah an hmang.

MNF Mizo National Day hmanna pui ber, Mizo Hnam Rûna inkhawm chu MNF vice president Lalthlengliana'n a kaihruai a; treasurer K Vanlal­auva'n thu sawiin, "Min chhuhsak tum ṭhin mah se, MNF hi Mizo nationalism kengtu kan ni," a ti.

K Vanlalauva chuan, India sorkar chêt dan avang­in January 14, 1966 khan Laldenga hoin Zarkawtah emer­gency meeting neih a ni tih sawiin, "Indian nationalism-in Mizo hnam bawh beh a tumna chu dodal a ṭul tiin, Zoram independence puan an rawt thlu ta a ni," a ti a; independence puan champha chu Mizo National Day tih vuahin an hman ṭhin thu a sawi.

MNF chuan retheih huamin hnam movement an kalpui nia sawiin K Van­lalauva chuan, "India sorkar nen kan inkap a, Mizo nula leh tlangval sang télte'n kan declara­tion - kan hnam humhim nan India nen kan indo a, tam takin nunna an hlân a ni," a ti.

MNF Mizo National Day hi Serchhipah pawh hman niin, MNF vice president Vanlalzawma'n a hmanpui a, MNF-in hun serh bik ní an ngah chu an ral ve mai mai dawn lo tih tilangtu a nih thu a sawi.