Smart City sum guideline-a tel ve lo Sports-ah hman a ni - Dr Vanlalthlana ; Committee-in a her rem - Deputy CM

Nimina Assembly session-ah ZPM member Dr Vanlalthlana chuan, Smart City sum ṭhahnem tak chu mission statement leh guideline-a tel sports atan hman a nih thu a sawi. UDPA changtu deputy chief minister Tawnluia chuan, committee-in a her rem angin sports atana hman a nih thuin a chháng.

Dr Vanlalthlana chuan, Smart City mission statement leh guideline-in a ngaih pawimawh zual 10 a tarlante chu tui, kawlphetha, zirna, hriselna, adt. a nih thu sawiin, "Sports a lang lo. Mahse, tender chhuah tawh 14 zingah playground pali, futsal ground pakhat, multipurpose ground pakhat leh outdoor recreation centre pakhat eng vangin a tel? Zirna leh hriselna lamahte a kal thei lawm ni?" a ti.

Dy. Chief Minister chuan, zirna, hriselna uar tur tih chu a awm ngei thu sawiin, "Committee-in a ngaihtuah a, heti zawng hian her rem ang hmiang a tih angin her rem theih a ni," a ti a; an kalphung chu sorkar laipui (khu lam) pawhin a pawmpui niin a sawi.

Zirna leh hriselna lam pawh an ngaih pawimawh thu sawiin Tawnluia chuan, "Ṭhalaite tana pawimawh em em infiamna lam, mipui vantlangin an chhawr tur hall leh programme dang tam tak kan nei. Smart City aṭanga hmalakna a kal ṭha," a ti.

Dr Vanlalthlana chuan, Smart City hnuaia sports atana hmante chu Chief Minister bialah dah a nih thu a sawi bawk.