February 2022-ah hripui vei 39,631, chhuahtir mi 47,792, thihpui mi 47

Kumin February thla chhung khan Mizoramah Covid-19 vei mi 39,631 hmuh chhuah a ni a, hmuh chhuah tam ber thla a ni. Hripui vei dam tawh mi 47,792 chhuahtir an ni a, hripui vangin mi 47 an thi.

IDSP report-a a lan danin, February 2022 chhung khan Covid-19 positive mi 39,631 hmuh chhuah an ni a, ni 28 awmin, chawhrualin ni tin mi 1,415 aia tam hret hmuh chhuah ang niin, positivity rate chawhrual chu 25.16% a tling. A hmaa positive hmuh tam ber thla, September 2021-ah mi 34,831 hmuh chhuah a ni a, February 2022-a hmuh zat aiin 4,800-in a tlem zawk.

February 2022 chhungin swam sample 1,57,521 endik a ni a; Covid positive hmuh chhuah an tam ber ní, ni 1-ah mi 2,573 hmuh a ni a, hmuh tlem ber ní, ni 27-ah mi 211 hmuh a ni thung.

Hripui vei dam tawh February thlaa chhuahtir zat chu mi 47,792 an ni a, positive hmuh zat aiin 8,161-in a tam zawk. Chhuahtir an tam ber ní, February 8-ah mi 2,409 chhuahtir an ni a, an tlem ber ní February 27-ah mi 539 chhuahtir an ni.

February 2022 chhung vekin Covid-19 vei mi 47 an thi a, thi an tam ber ní, February 10-ah mi panga an thi a, thi an awm loh ní, ni ruk a awm.