Ráltlânte harsa loa an awm theih nan hma kan la zel ang - Chief Minister

Chief minister Zoramthanga chuan, Myanmar buaina avanga Mizorama rawn ráltlânte chu harsa lo leh mangang loa an awm theih nan hma an lak zel tur thu nimin khan Assembly House a hrilh.

INC member Lalrindika Ralte zawhna kal zelah Chief Minister chuan, raltlan an pun zel thu sawiin, "Chin hills aṭanga lo kal an tam chak zual. Raltlante pui turin India sorkar kan ti a, signatory nih lohna lai a ni a, a langa puih a rem lo. A taka mikhualtu kan ni a, theihtawpin sorkar, kohhran, tlawmngai pawl, zirlai pawl leh mipui ṭangrualin kan pui a ni," a ti a, raltlante'n lawmthu an sawi mawlh mawlh thu a sawi.

Zoramthanga chuan, raltlante tan India sorkarin Mizoram sorkar a ṭanpui tih sawiin, "Keini lamin direct-in raltlante kan ṭanpui. Puihna la dawng kim lo deuh an awm a, chungte chu an awmna chin hriat loh vang a ni," a ti.

Chief Minister chuan, DC kaihhruai committee-ah sum pek ṭhin a nih thu sawiin, "Harsa lo leh mangang loa an awm theihna atan hmalak zel a ni ang. Ei tur emaw, thil dangah emaw ṭan kan la zel dawn. Tunah hian ṭanpuina central-ah kan dil leh a, inpuih leh theih ngei kan beisei. Raltlan harsatna tâwkte chu mimal ang pawhin min rawn hrilh u la, hma kan la zel ang," a ti.