Social media-a thu dik tâwk lo thehdarh vangin Covid vaccine la duh lo an awm - Health Minister

Health minister Dr R Lalthangliana chuan MNF member Dr ZR Thiamsanga leh Zothantluanga te zawhna inṭâwm chhangin, Covid-19 vaccine pek kawnga harsatna tawhte Assembly House a hrilh.

Health Minister sawi danin, sakhuana avang leh social media-a thu dik tâwk lo thehdarh avangin vaccine la duh lo an awm a, hmun kilkhawr, lirthei luh theih loh hmunah vaccine chak takin a pek theih loh a, network a ṭhat loh avangin hmun ṭhenkhatah harsatna a awm bawk.

Zawhna dang chhangin Dr R Lalthangliana chuan, Zoram Medical College/VRDL chu ZMC Genomic Sequencing Laboratory-ah bun tawh a nih thu sawiin, “A thlawnin he khawl hi PATH (USA) min rawn pek a ni,” a ti.

Health Minister chuan, genomic sequencing tih ṭan a la nih loh thu sawiin, “Test/trial run ṭum thum neih tawh a ni a, reageant/kit dik tâwk loh avangin a la hlawhtling lo deuh,” a ti a; regeant/kit thar leh technical specialist-te an lo thleng mai tura beisei a nih thu a sawi.