Zenghri pêk beihpui thlâk a ni

Nimin March 1 kha National Immunization Day (IPPI) a ni a, India ram pumah naupang kum 5 hnuai lamte hnenah zenghri danna damdawi (oral polio vaccine) pek beihpui thlâk niin, Mizoramah pawh naupang ṭhahnem tak hnenah pek a ni.

Zenghri danna pek beihpui thlâk pual hian Health Services chuan hawnna inkhawm an buatsaih a, assistant state immunization officer Dr B Lalthantluanga'n kaihruaiin, National Health Mission mission director Dr Eric Zomawia'n a hmanpui.

Dr Eric Zomawia chuan, natna chi hrang hrang danna leh vènna lâk a pawimawhzia sawiin, hmun hrang hrangah la duh lo an awm ṭhin chu pawi a tih thu a sawi a, "Mipui zingah vaccine kan hriat dan a la chiang tawk lo a, nute'n kan fate vaccine lâk hun an hriat a pawimawh. Covid-19 léng mekah pawh vaccine la thei chuan lak vek a pawimawh a ni," a ti.

Dr Lalmuanawma Jongte chuan, tun ṭuma zenghri beihpui thlakah hian naupang kum 5 hnuai lam 1,00,000 vel hnenah pek tur a nih thu a sawi.

Lungleiah chuan District Task Force on Immunization chairman Kulothungan A, bawrhsapin Lunglei Chanmari Sub-Centre-ah a hawng. Lunglei district-ah hian booth 224 aṭangin naupang 14,899 hnenah zenghri danna pek tur a ni.

Kolasib DC Dr H Lalthlangliana pawhin Kolasib Diakkawn Salem Clinic-ah zenghri danna pek beihpui thlakna a hawng. Kolasib district-ah hian naupang kum 5 hnuai lam mi 9,063 hnenah vaccination booth 102 bakah, high risk area hmun 10 leh transit point pahnih kaltlangin zenghri danna pek tura ruahman a ni.