Covid-19 positivity rate a tlahniam hret hret

February 28, Thawhṭanni khan Mizoram Covid-19 vei mi 1,325 hmuh chhuah a ni a, positivity rate 18.25% a ni. Nimin khan hripui vei dam tawh mi 1,161 chhuahtir an ni a, Covid-19 vei mi pakhat a thi.

Covid-19 vei Thawhṭannia hmuh tharte chu mipa 596 leh hmeichhia 729 an ni a; RT-PCR hmanga hmuh 87, TrueNAT hmanga hmuh 84, RAT hmanga hmuh 1,145 leh FIA hmanga hmuh pakua an ni.

February 28-a Covid-19 positive hmuh zat mi 1,325 chu swab sample endik zat aṭangin 18.25% a ni a; positivity rate ni 36 chhung a záwna 20% chung lam a nih hnua a záwna ni hnih chhung 20% aia hniam a ni leh tawh.

IDSP record angin, Mizoramah Covid-19 vei 2,14,653 hmuh chhuah a ni tawh a, mipa 1,00,340 leh hmeichhia 1,14,313 an ni a, mipa aiin hmeichhia 13,973-in an tam zawk. Nimin tlai dar 5 thleng khan mi 2,08,277 (97.03%) chhuahtir an ni tawh a, mi 658 (0.31%) thi tawhin, enkawl mek mi 5,718 (2.66%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,14,653 chu mi 1,000 zelah hripui vei mi 195 an awm ang a ni a; mi 1,00,000 zela Covid-19 vangin mi 60 an thi tawh ang a ni tih sorkar thuchhuakin a tarlang.

Mizoramah February 28, 2022 thlenga swab sample endik tawh 18,33,595 aṭanga positivity rate chu 11.71% a ni a; RT-PCR hmanga endik zat percentage chu 20.22 a ni a, RAT hmanga endik zat chu 74.11% a tling.