KHAWTHLIR

Thisen pe
Haulawng Branch YMA chuan an din champha vawi 50-na, golden jubilee pualin nimin khan an khuaa Hausiampa Hall-ah thisen pek rûnpui an buatsaih a, Civil Hospital, Lunglei tan thisen unit 75 an pe a, petute mipa 59 leh hmeichhia 16 an ni. Haulawng Branch YMA hi March 1, 1972 -a din a ni a, member 1,003 an awm mek.

Raltlante tanpui
Kolasib Sub. Hqrs. YMA chuan nimin khan an district chhunga branch YMA hrang hrangte thawhkhawm hmangin an huam chhunga khaw paruka Myanmar aṭanga rawn raltlan mi 161 hnenah Rs 2000 ṭheuh, buhfai leh thawmhnaw an hlan. Ṭanpuina an pek chhuah zawng zawng chu Rs 3,22,000 a ni.

Governor leh MRB
Governor Hari Babu Kambhampati chuan nimin khan Raj Bhavan-ah Mizoram Rural Bank (MRB) hotute a kawm a, an hmalakna leh hmachhawpte a sawipui. MRB hi district tin leh RD block tinah awmin, branch 97 an nei a, kum 2023 ral hmain customer service points, district 11-ah model village siam leh branch 100 neih hman an tum thu an sawi.

Rakzu litre 14,682.750 man
Excise & Narcotics department chuan kum 2022 chhungin (January & February) rakzu litre 14,682.750, zu bilh lai ṭín 22,652, zu siamna bungbel 390, dawidim kg. 103.850, sap zu úm puitling 2,131, úm tê 285, beer úm/can 2,925 leh Myanmar zu litre 532.100 an man. Heroin kg. 2.293, ganja kg. 43.859, methamphetamine kg 13 leh ruihhlo dang eng emaw zat an man bawk.

PPE 1,000 hlân
Tzu Chi leh India Formosa Foundation-te chuan nimin khan Health department hnenah Covid-19 dona hmanrua, personal protective equipment (PPE) kit 1,000 an pe. PPE inhlanna hi Joint YMA Field, Vaivakawnah neih a ni a, Health Services director Dr H Lalchungnunga’n department aiawhin a dawng.

Heroin man
Lunglei Police leh CID(SB) ṭangkawp chuan nimin khan heroin gram 257.8 leh a neitua puh Zomuanpuia (26), Lunglei Venglai an man. Heroin an man hi tualchhunga hralhna ang chuan cheng nuai 9.9 hu a ni.