MLA candidate zingah CYMA leh MZP Office bearer hlui mi 13 an awm

November 28, 2018-a Mizo­ram Legislative Assembly inthlanpui awm tura political party hrang hrangin candidate an puan tawh zingah Central YMA leh MZP general head­quar­­ters-a office bearer (OB) ni tawh mi 13 an tel.

Pawl pahnih OB ni tawh candidate mi 13 zinga panga chu Central YMA OB ni tawhte an ni a, pakua chu MZP OB ni tawhte an ni thung.

Aizawl West-II biala MNF candidate Lalruatkima chu CYMA leh MZP OB ni tawh ve ve a ni a; Aizawl West-III biala MNF candidate Vanlalzawma leh East Tuipui biala Indian National Congress (INC) candidate T Sangkunga te chu CYMA president hlui an ni.

CYMA OB hlui candidate ni tur dang - Aizawl East-I biala ZPM candidate K Sapdanga chuan term hnih chhung assistant secretary post a chelh a, Aizawl West-I biala MNF candidate K Sangṭhuama'n term 9 chhung treasurer leh finance secretary post a chelh. MNF candidate Lalruatkima'n term 8 chhung finance secretary, assistant secretary leh general secretary post-te a chelh a ni.

MZP office bearer hlui zinga MLA candidate tura puan tawhte chu - Ṭawi biala BJP candidate tur Prof. JV Hluna, Serlui biala ZPM candidate Lalmuanpuia Punte, Aizawl South-I biala INC candidate R Vanlalvena, Chalhfilh biala MNF candidate Lalchhandama Ralte, Serlui biala INC candidate Lalhmachhuana, Tuichang biala INC candidate James Thanghmingmawia, Aizawl West II biala MNF candidate Lalruatkima te chu MZP president hlui vek an ni a; Aizawl South-III biala INC candidate KS Thanga chu MZP vice president a ni tawh bawk.

Central YMA OB hlui can­didate tur zingah hian K Sangṭhuama, Vanlalzawma leh Lalruatkima chu MNF candidate an ni a, T Sangkunga chu INC candidate niin, K Sapdanga chu ZPM candidate a ni.

MZP OB hlui candidate tur zingah KS Thanga, R Van­lalvena, PC Laltlansanga, James Thanghmingmawa leh Lalhmachhuana te chu INC candidate an ni a; Lalruatkima leh Lalchhandama Ralte chu MNF candidate niin, Lalmuanpuia Punte chu ZPM candidate a ni a, Prof. JV Hluna chu BJP candidate tur a ni.

MLA candidate zinga CYMA leh MZP OB hluite
Hming Party Dinna Bial OB Nihna
K Sangṭhuama MNF Aizawl West-I CYMA
Vanlalzawma MNF Aizawl West-III CYMA
T Sangkunga INC East Tuipui CYMA
K Sapdanga ZPM Aizawl East-I CYMA
Lalruatkima MNF Aizawl West-II CYMA/MZP
Prof. JV Hluna BJP Ṭawi MZP
KS Thanga INC Aizawl South-III MZP
Lalmuanpuia Punte ZPM Serlui MZP
R Vanlalvena INC Aizawl South-I MZP
Lalchhamdama Ralte MNF Chalfilh MZP
PC Laltlansanga INC Aizawl West-I MZP
James Thanghmingmawi MNF Tuichang MZP
Lalhmachhuana INC Serlui MZP