Mizoramah TI project 32 a awm

Mizoram State AIDS Control Society (MSACS) chuan October 30, Thawhlehni khan Aizawl SP pisa conference hall-ah kumin chhunga MSACS hnuaia tum bik neia hmalakna, Targetted Intervention (TI)-a thawk NGO-te hnathawh dan thlirletna hun an buatsaih a; Mizoramah TI project 32 a awm a, chung zinga 24 chu NGO-te'n an enkawl a nih thu tarlan a ni.

MSACS project director Dr Lalmal­sawmi Sailo chuan, TI project-a thawkte'n an hnathawhna huam chhungah inchiu

ṭhin la ziah luh loh an la tam nia a lan avangin ṭan lak leh zual a ngai tih a sawi a; Lungdai khuaah Presbyterian Kohhranin ruihhloa inchiu ṭhinte tan a thlakna tur damdawi ei chi Oral Substitution Therapy (OST) sem chhuahna hmun (OST Centre) enkawl hna an kalpui mek chu Mizorama HIV darh zel tur venna kawnga kohhran leh khawtlang dangte tana entawn tlak a nih thu a sawi bawk.

TI hi Mizorama ruihhloa inchiu ṭhin­te bakah, hmeichhia inzuar ṭhinte leh mipa, mahni anpui kawp ṭhinte tana hmalakna a ni a; review meeting-ah hian April-September 2018 chhunga TI project 32-te hnathawhte thlir let a ni. TI hmalakna hrang hrang zingah HIV enfiah leh HIV+ve zinga Anti Retroviral Therapy (ART) damdawi la ei lote'n an ei ngei theih nana ṭan lakte chu a langsar zual a ni.

Mizoramah MSACS hnuaia TI division leh basic service division-te ṭangkawpin TI zawng zawngah awlsam zawka HIV test theihna, Community Based Screening (CBS) a awm vek a; CBS test hmang hian thla ruk (April-September 2018) chhungin high risk group (HIV kai mai thei tura ngaih)-te zinga mi 6,742 endik tawh a ni a, chu'ng zinga mi 238 chu HIV+ve an ni tih hmuh chhuah a ni.

MSACS hian nimin khan NLUP Conference Hall-ah TI project manager-te pualin review meeting an buatsaih leh bawk.