Inthlan zawhah MNF party leh BJP ten Thawhho an tum ngei - MPYCC President
Congress ṭhalai, Mizoram Pradesh Youth Congress Committee (MPYCC) president Dr Lalmalsawma Nghaka chuan, MNF party leh BJP-te chu a rûkin an thawkho ngei a, inthlan laiin a langa thawkho si loin, inthlan zawha sorkar siam tumin thawhho an tum niin a sawi.
Aizawl West-II biala INC candidate Dr Lalmalsawma leh Aizawl East-I biala INC candidate R Vanlalráwna te leh MPCC Media department hotute chuan nimin khan Aizawl Press Club-ah thuthar thehdarhtute an kâwm a; Mizoram inthlanpui result puan hnu, sorkar siam tumnaa MNF leh BJP-te'n thawhho an tum dan an sawi a ni.
Dr Lalmalsawma chuan, MLA inthlan tur boruak ngaihtuahin, Mizote rilru, tisa leh thlarau tichhe thei hmelma an awma an hriat thu sawiin, "Kan sakhaw rawngbawltute pawhin an ngaimawh em em a, Pathian thu an sawina apiangah an sawi lang. Central YMA pawhin ngai pawimawhin, tun hnaia Mizoram BJP hruaitute nen an inkawmnaah an sawi chhuak tih kan hmu a ni," a ti a; Mizo ram, hnam leh Pathian rinna vawnghim thei tura theihtawp chhuahpui turin Mizo mipui a sáwm.
BJP-in a din North East Democratic Alliance (NEDA)-ah MNF an tel avangin Mizoramah MNF leh BJP-te chu an thawk dun tia puhna a awm tawh ṭhin tih sawiin Dr Lalmalsawma chuan, "October 23, 2018 khan internet kaltlanga chanchin thar thehdarhtu www.tripurainfo.com. chuan BJP leh MNF-te'n inzawmna an neih ngei thu a tarlang a, zêp leh thup theih a ni ta lo. Mizorama BJP tana campaign Tripura BJP general secretary Pratima Bhowmik chuan Mizoram inthlan zawhah sorkar siam tumin BJP leh MNF an thawkho dawn tih a sawi a ni," a ti.
MPYCC President sawi danin, Tripura aṭangin BJP hruaitu chief minister Biplab Kumar Deb, minister Santana Chakma leh BJP MLA pahnih Pramod Reang leh Shambhu Lal Chakma leh BJP national secretary (NE) Ram Madhav te chu BJP tana campaign-in Kamalanagar (Chawngte)-a vantlang inkhawmah thu an sawi. Central-a BJP hruaitute'n Tripura-a BJP hruaitute chu Mizorama Chakma leh Bru awm tamna bial pangaah chak ngei turin an ti a ni.
Dr Lalmalsawma chuan, MNF leh BJP-te'n inthlan zawhah thawhho an tum avangin, a hma aṭanga Aizawl East-I bial vil rengtu Prof. JV Hluna, Mizoram BJP president chu Ṭawi bialah a insawn tih sawiin, "MNF President nena bial thuhmuna ding lo tura Central BJP hotute'n an tih vang niin kan hria," a ti.
Mizoramin inthlanpui a hmachhawn mekah lang thei leh lang lo aṭangin ringtute’n nasa taka beihna an tâwk mek nia sawiin MPYCC President chuan, "Kan sakhaw zalenna leh kan hnam dam khawchhuahna tur kan thlang dawn nge, kan hnam leh sakhaw himna vote-in kan hralh dawn tih hi duhthlanna min hmuaktu a ni," a ti a; sakhaw zalenna tichhe thei political party leh Mizorama an thawhpui party-te chu hnâwl vek turin Mizoram mipui an ngen tih a sawi.