Hnam Inpumkhatna ni hman a ni
India ram tana zalenna sualtu leh India ram pumkhata siamtu zinga langsar ber pakhat - Sardar Vallabhai Patel pian champha vawi 143-na pualin nimin khan India ram pumah 'Ram leh Hnam Inpumkhatna Ni' (Rashtriya Ekta Diwas) hman a ni. Mizoramah pawh hman a ni a, Aizawlah chuan Lammualah Governor Kummanam Rajasekharan hoa hman a ni.
Rashtriya Ekta Diwas pual hian Aizawlah chuan Run for Unity (Inpumkhatna Kawngzawh) buatsaih a ni a; Sikulpuikawn aṭanga kawng zawhte chu chief secretary Arvind Ray-a'n a vai liam a, Chanmari kâwn aṭanga kawng zawhte chu School Education secretary Esther Lalruakimi'n a vai liam. Hmun pahnih aṭanga kawng zawhte hi Lammualah an lut khawm a ni.
Lammuala intawhkhawmnaah hian - contingent panga - 46th. Assam Riffles pipe band, 90th. Border Security Force, 1st. Bn. Mizoram Armed Police leh 3rd. Bn. Mizoram Armed Police-te'n hnam puanzar chibai an bûk a, Governor-in a lo chhang lêt.
Rashtriya Ekta Diwas programme-ah hian India khua leh tuite tana inpumkhatna leh ram venhimna kawnga intiamna thuchham chu Larsap Kummanam Rajasekharan chuan a kaihruai a; Governor hian thuchah a sawi nghal.
Larsap chuan, Sardar Vallabhai Patel chu hruaitu ropui chungchuang, India ram pumkhata siam a nih theihna atana lal ram 500 chuang India ram chhunga tél khawmtu a nih thu a sawi a, "Administration-ah pawh hma hruaitu, all India services siamtu, kawng tam taka India ram hmasawnna atana a bul ṭantu leh India chu ram ropui a nih theihna atana kawng tin renga hna thawktu ropui a ni," a ti.
Rashtriya Ekta Diwas hi October 31, 2014 aṭang khan Sardar Vallabhai Patel pian champha pualin India ram pumah hman ṭan a ni. Sardar Vallabhai Patel zahna lantirna leh a pian champha puala prime minister Narendra Modi duh dan anga Gujarat-a Sardar Vallabhai Patel-a lim, 'Statue of Unity' tia vuah chu PM Narendra Modi chuan nimin khan a hawng. Statue of Liberty hi metre 182-a sáng niin, khawvela lim (statue) sang bera ngaih a ni a, a siam nan cheng vbc. 2989 sèn a ni.