KHAWTHLIR

Opium neitu hrem
Opium gram 48 kawl vanga Excise & Narcotics department-in May 15, 2018-a an man, Chuangkimi w/o Thangchuailova, Siaha Matu Veng chu Siaha Special Court (NDPS Act) judge Dr HTC Lalrinchhana chuan nimin khan NDPS Act Section 18(c) tlawhchhanin thiam loh a chantir. Chuangkimi hi kum 3 chhung jail-a táng tur leh Rs. 10,000 chawi tura tih a ni a, pawisa a chawi loh chuan ni 100 dang tàn belh tura tih a ni.

ZPM-ah lut
ZPM Aizawl West-III chuan thuchhuah siamin, Aizawl West-III bial chhunga Khatla South Congress unit-II chu ZPM-ah an inchhûng lut a, October 30, 2018 zan khan ZPM candidate VL Zaithanzama hoin Khatla South ZPM Steering Committee-II an din tih an puang. Congress aṭanga ZPM-a inchhûng lut tate hian October 23, 2018 khan Congress Bhavan-ah seal thehlutin bànna an thehlut tawh tih an tarlang.

Run for Unity
National Unity Day (Rashtriya Ekta Diwas) lawm nan Project Pushpak chuan nimin khan Zemabawkah Run for Unity an buatsaih. He kawngzawhah hian Kendriya Vidhyalaya zirlaite leh zirtirtute bakah, Zemabawk mi ṭhenkhat an tel a ni.

Mamit tlawh
Additional chief electoral officer Krishna Mohan Uppu chuan, nimin khan Mamitah a tlawh a, strong room leh vote counting hall-te tlawhin a enfiah. Mamit DC leh SP-te chu strong room leh vote counting hall siamṭhat ngaite a sawipui bawk.

Champhaiah training
UDPA department hnuaia DAY-NULM chuan, nimin khan Champhai khawlaia chawhmeh leh nepnawi zuarte pualin Champhai IPR Auditorium-ah training an buatsaih. He hunah hian ei tur thianghlim zawka zawrh dan zirtir a ni.