Chung lamin MNF sorkartir a tum - Vanlalzawma

MNF treasurer Vanlalzawma, MLA chuan, Congress party kaihhruai sorkar chu zu an zawrh avangin Mizoram mipui leh kohhrante'n thlak an duh nia sawiin, MNF party chu chung lamin sorkar a tum niin a sawi.

Vanlalzawma hian nimin khan MNF Hachhek West Block Conference leh mi thar lawm luhna inkhawm, Zawlnuam Bawrai community hall-a neihah thu sawiin, "Ram mipui ang te, kohhran angte pawhin Congress sorkar zu zuar hi thlak kan duh a, Pathian leh mipui zarah MNF kan sorkar ngei dawn. MNF sorkar thar lo piang turah hian Mizo hnam damna a awm a, retheite lei rem rah ve theihna tur duan sa SEDP chu a taka thawh a ni ang," a ti.

MNF chuan a tirah bial tinah candidate nih tum an nei nual tih sawiin Vanlalzawma chuan, "Bial khatah pakhat bak a din theih si loh a, mahse, tumah vuivai leh titau kan awm lo a, ṭhahnemngai takin kan inṭawiawm tlang dial dial thei hi a lawmawm a, Pathian hnathawh a ni," a ti a; tuna MNF boruakah chuan an sorkar ngei dawn tih a chiang tawh niin a sawi.

MNF Treasurer chuan, Congress party aṭangin Minis­ter, MLA leh chairman nihna aṭanga báng an awm nual tawh tih sawiin, "Zo Carbon chungchangte leh Congress mualphona tam tak hi keimahni beih leh thawh rah a ni lo. Amaha rawn inkahpupchawin a lo piang chho zut zut a, chung lamin sorkar kan hrawn mek Congress hi paih a, MNF sorkartir a tum vang a ni," a ti.