Politician hlun tak takte'n kan party An zawm thuai dawn - James Sangma

National People's Party (NPP) thupuangtu, Meghalaya Home minister James Sangma chuan Mizorama politician hlun tak takte'n an party an zawm thuai dawn niin a sawi.

James Sangma hian nimin khan thuchhuah siamin, an party candidate tur puan thuai a nih tur thu hi a tarlang a, "NPP chuan uchuak tak leh thawm lian satliah ringawta hma lak kan tum loa, candidate tam aia candidate rintlak neih kan tum. Kan party-in Mizoramah hma thar a la mek a, kan kal zelna tura min rintlak leh mi rinawm, MLA an tling emaw tling lo emaw, Mizo mipuite'n hruaitu ena an en zui theih tur kan thlang dawn," a ti.

Mizoram MLA bial zawng zawngah candidate tur an neih thu tarlangin James Sangma chuan, "Kan party hotute'n an enchiang ang a, mi ṭha candidate kan neihna tur bial kan chuh ang. Hun rei loteah party candidate puanna kan nei theiin ka ring. Candidate ngah lamah kan buai lo," a ti a, Mizo mipuite pawhin mi ṭha tia an hriat chauh candidate an dah tur thu a sawi.

Mizorama politician mi hriat hlawh tak tak an party-ah an lalut thuai dawn nia sawiin NPP Thupuangtu chuan, "Hma kan la ṭan chauh a ni a, chuti chung chuan kan party ṭhan chhoh danah kan lung a awi hle. National party dang anga lo lut a, chhuak leh mai tur kan ni lo. India ram tribal-te lenna party kan ni a, chumi tur chuan Mizoramah pawh hma kan la chhunzawm zel dawn a ni," a ti.