Congress an sorkar loh chuan BJP control theih an sorkar dawn - Thanzara

Aizawl North-III Block Congress chuan nimin khan Chanmari Kawnah Congress Campaign Office hawnna leh Campaign Kickoff an buatsaih a, Aizawl North-III a INC candidate Lal Thanzara chuan Congress a sorkar loh chuan BJP control theih a sorkar tur thu a sawi.

Lal Thanzara chuan BJP president Amit Shah-in Mizoramah Krismas BJP sorkarna nen kan hman tur thu a sawi nia tarlangin, "BJP-te hi Hindu lal ram din duhtu leh Kristiante nuai chimih tumtu an ni. Kristianten kan thawhpui tur a ni lo. Vawiin nia BJP te thawhpui party leh thawhpui duh leh chak party an awm hi a vanduai thlak a ni. Naktuk lawka kan vote thlak turah Kristiante nuai chimih tumtu hi kan hnawl ngam tur a ni," a ti.

BJP chuan sum hmanga inleitlin an tum dawn tih sawiin Lal Thanzara chuan, "MNF te hian BJP hi inthlan hmain thawhpui lo mah se, inthlan zawha thawhdun pui an tum a, thawhhonaah harsatna an neih lo. MNF party te hian BJP nena kan thawkho dawn lo an ti anih chuan NEDA atang hian inhnukdawk rawh se. Kan ramah Congress a sawrkar loh chuan BJP control theih sawrkar a ding dawn," a ti.

Lal Thanzarra chuan ram hi Lalpa ta a nih avangin, Mizo mipuiten Lalpa zawnchhuah ramah roreltu dik kan neih theihnan tun ṭum inthlanah hian kan ngaihtuahna kan sen ngun tih sawiin, "Tu sorkar laiin nge Lalpa zawnchhuah ramah hian hmasawnna tak tak thleng le tihte hi inzawt fo i la. Tu sorkarah nge ram hi ralmuang a, kuthnathawkte an thlamuan le? MNF hi kuthnathawk pawlin Aizawla chemtum nen kawng an zawh khum a ni," a ti.