ECI leh MPF thu zâwm turin ZPM-in ngen

Zoram Peoples' Move­ment (ZPM) Vigilance department chuan thuchhuah siam­in, Supreme Court thu­pek anga Election Com­mission of India (ECI)-in tih tur leh tih loh tur a tihte leh, Mizoram People Forum (MPF) leh political party-te Thawhhona Thuthlungte chu felfai taka zâwm turin political party tinte leh mipuite an ngen.

ZPM Vigilance department chuan, MPF leh political party-te Thawhhona Thuthlung an siam chu political party tinin pawmin, an president-te'n hming an ziah hnan a nih thu an tarlang a, "Hei thil pawimawh tak mai a ni a, kan rama inthlanna felfai leh thianghlim a awm theihna tur te, ram hruaitu felfai leh ram tana mi chhuanawm Pathian ṭih mi kan ramin a neih theih nan ZPM Vigilance department chuan theihtawp a chhuah dawn. Supreme Court direction ang leh MPF-te thu hi felfai taka zâwm turin ram hruaitute leh mipuite kan ngen a ni," an ti.

ZPM chuan, ECI-in Supreme Court thu anga tih tur (direction) a pekte chu zawm a nih leh nih loh ngun takin an thlir dawn tih sawiin, "He direction zâwm lo an awm chuan returning officer-ah complain submit zel tur a ni ang a, a ṭul ang zelin ECI-ah complaint thehluh a ni ang," an ti a; ECI-in candidate zinga criminal case neite tih tur a tukte chu zawm ngei turin criminal case neite an phût a ni.

Supreme Court thu anga ECI-in direction a pek ang chuan, MLA candidate turte'n nomi­nation paper an thehluh ṭhin affidavit form 26 siam thar a ni a, chu chu C1, C2 leh C3-ah ṭhen a ni.

C1-ah chuan, can­didate-ten an nomination an thehluh rualin an criminal case neih lai case no./FIR no./Conviction no. an tarlang ngei tur a ni. C2 chu political party tinte'n an candidate zinga criminal case nei laite thubuai neih dan kimchang an puanzarna tur a ni a, an party website-ah emaw, TV channel-ah leh state chhunga chanchinbu darh zau berah ni thum chhung an puangzár tur a ni.

Form C3 chu returning officer-te tih tur a ni ve thung a, candidate zinga criminal case nei zawng zawngte chu an thubuai neih dan chanchin kimchang chanchinbuah leh TV-ah puangzar tura hriattirna written reminder a pe tur a ni, tihna a ni.

Criminal case puanzar hun chu Mizoram in­thlanpui atan chuan No­vember 15–26, 2018 chhunga tihchhuah tur a ni.