CYMA leh ZPM an inkâwm Inthlan hma leh hnuah ZPM-in BJP thawhpui tum lo

Central YMA hruaitu, office bearer-te chuan nimin chawhnu dar 2 khan Zoram Peoples' Move­ment (ZPM) pisaah lêngin, Mizoram inthlanpui awm tura Central YMA duh dante ZPM hruaitute an sawipui. Mizoramah inthlanna dik leh felfai a awm chu YMA duh ber a ni tih an sawi a; ZPM hruaitute chuan, inthlan hma leh inthlan hnuah BJP thawh­pui an tum loh thu an sawi.

CYMA president Vanlalruata chuan, Mizoram inthlanpui awm turah mipuite'n zalen taka an duh ber an thlan theih an duh ber tih sawiin, "Tun hmain Mizoram inthlanah hel inrawlh a awm tawh ṭhin a, hmetmit turin YMA-in hma a la tawh ṭhin. Tunah chuan hel thawhpuina thleng tawh lo se kan duh. Tute emaw chakna ringa 'Chu chu vote rawh u' tihna lakah fihlim turin kan beisei che u a ni," a ti.

Vanlalruata chuan, BJP nena inzawm RSS hotute'n Bru hruaitute leh Bru Revolutaionary Army (BRA) hotute ko khawm a, inthlana vote tur an hrilh chu pawi an tih thu a sawi a; ZPM hruaitute chu Tripura-a Bru camp-ah campaign lo tur leh inthlanna muanawm Mizorama awm ṭhin chu kengkawh zel turin a sáwm a ni.

CYMA general secretary Lalhmachhuana chuan, YMA chuan inthlanna felfai leh thianghlim a duh tih sawiin, ruai ṭheh leh sum sem, sum chelek a awm palh an hlauh thu a sawi a; uchuak tak leh ṭawngkam mawi lo hmanga inbeih chu Mizo zia a ni lo tih sawiin, puitling taka inthlan hmachhawn turin ZPM a chah.

Lalhmachhuana chuan, Chakma leh Bru chungchang sawiin, "Chakma candidate nei lo turin kan ngen a, ZPM hi chuan Chakma candidate neih in tum lo niin kan hria a, a lawmawm hle," a ti. Social media leh media dang hmanga inbeihna a nasa sâwt hle tih sawiin, "Thu puarpawléng, finfiah hleih theih loh, mipui tichiai thei si lakah i fimkhur ang u," a ti bawk.

CYMA General Secretary chuan, ZPM an sorkar ta a nih chuan, ruihhlo do kawngah nasa zawka hma la turin a ngen a; hemi chungchangah hian ZPM leader K Sapdanga chuan, "ZPM sorkar chuan zu a zuar lo ang, tiin resolution kan nei tawh a ni," a ti.

ZPM Steering Committee chairman Lalliansawta chuan, ZPM leh CYMA thil duh te, an vei zawngte chu a inan thu sawiin, "Bru leh Chakma chungchangah te, ramri thilah te, inthlana sum sem chungchangahte kan duh dan a inang vek a ni," a ti a; ZPM chu sum sem kawngah venthâwn ngai lo ber an nih tur thu leh sum sem tur pawh an neih ve loh thu CYMA hruaitute a hrilh.

Chakma candidate neih loh chungchangah K Sapdanga chuan, candidate tur hrim hrim chu an awm zel thu sawiin, "Keini chuan Joint NGO ráwl kan ngai pawimawh a, Chakma candidate neih kan tum lo tawp a ni," a ti a; tuna candidate an la dah lohna bial ruakah pawh candidate tur an hmu lo ni loin, siamrem hlek ngai a la awm vang a nih thu a sawi.

CYMA hruaitute'n inthlan hma emaw, inthlan hnu emawa BJP leh Chakma thawhpui chungchang an zawhna chhaangin K Sapdanga chuan, "ZPM chuan pre & post poll-ah BJP thawhpui loh kan rel a, resolution kan nei tawh a ni," a ti.

CYMA hruaitute'n Val Upa Coun­cil (VUC) chungchang an zawh­na chhangin K Sapdanga chuan, Congress party-in Congress Working Committee (CWC) an neih leh left party-te'n Politburo ang deuh a nih thu a sawi a, "ZPM-a ruat ngai leh chinfel ngaite khawihtu tur a ni a, thurawn petu tur a ni. Chief Minister tur an ruat tawh a, a thawhpui turte pawh an ruat leh ang. CM leh minister-te kal sualna leh thuneihna hman sual laka vengtu tur a ni," a ti a; VUC chu policy thil leh sorkar chetnaah an inrawlh dawn loh thu a sawi.