CYMA leh MPCC an inkâwm

Central YMA office bearer (OB)-te chu nimin khan Congress Bhavan-ah léngin an inkâwm a, MPCC hruaitute'n an president Lal Thanhawla hoin an lo dawngsawng. CYMA hruaitute chuan, hnam bil leh chi bila politics khelh loh an duh thu an sawi.

Mizoram sorkar leh HPC(D)-te'n inremna an siamin, Sinlung Hills Development Council (SHDC) ṭhiatin, Sinlung Hills Council (SHC) din a nih thu sawiin CYMA hruaitute chuan, "SHC-ah hian Mizoram electoral roll-a chuang miah lo hruaitute an awm a, Zoram mipui tan a him lo em tih ngaihtuahna a awm. HPC(D)-te inremna siampuite hi Mizoram mi an ni a, Manipur leh Cachar lamah an la awm a, bu an la rawn khuar leh thei. Mipuite thinthi takin awm se kan duh. Silai mu semte a thleng leh ang tih kan hlau a ni," an ti.

CYMA president Vanlaruata chuan, Congress party-in candi­date an sîksawi danah sawi tur an nei lo tih a sawi rualin, "Remna siampui tawh aṭanga sîksawite a awm niin ka lo hria," a ti a; chi bil zawnga politics khelh chu YMA-in a duh ngai loh thu a sawi.

Kumin inthlan turah sum leh therhlo ti lo turin theihtawp chhuah ni se an duh thu sawiin Vanlalruata chuan, "Pawisa nei lo tana candidate chance a awm loh phah tur khawpa thil tih a hlauhawm. Voter kan tlem a, ECI-in a phal chin cheng nuai 20 pawh hi Mizoram tan chuan a tam mah mah em tih kan ngaihtuah. Inthlanna fel leh thianghlim kan neih theihna atan i ṭang tlang ang u," a ti.

CYMA President chuan, Tripura relief camp-ah political party-te campaign lo se YMA-in a duh tih sawiin, "Vehthlêm an awm chuan kan ṭang tlang turah kan ngai. Election Commission hian inthlanna felfai an duh lo emaw tih tur khawpin, lo haw duh lo an camp-a vote thlaktir an tum ṭâlh a ni. ECI pawh kan dodal tih kan hrilh a, a tawrh pawh kan huam," a ti a; Tripura-a Bru-te chu vote an thlak a nih pawhin, Mizorama vote an neihna hmun ngeia vote thlaktir chu an duh dan a nih thu a sawi.

CYMA general sec­retary Lalhmachhuana chuan, zu phalrai chung­changah, thingtlang lama YMA hruaitute chuan ruihhlo dang aiin zu an buaipui zawk tih a sawi a, "Political party dang kan kawm tawh chinah chuan, mipui leh kohhran duh dan angin zu an kalpui tur thu an sawi hlawm. YMA chuan zu hi kan sawi mawi thei lo," a ti.

CYMA hruaitute chuan, Chakma candidate neih loh chu NGO Co­ordination Committee-te dinna a la nih reng thu sawiin, "Party ṭhenkhat chuan neih loh vek chuan neih loh an inhuam a ni. A nei luite laka hmalak zel dan tur chu NGO Coordination Committee-in a la rêl ang," an ti a; Chakma MLA an awm a nih pawhin, dinhmun sang pek loh chu YMA duh dan a nih thu an sawi bawk.

MPCC president Lal Thanhawla chuan, an party chuan inthlanna felfai an duh ber tih sawiin, "Felfai taka inthlan duh vangin door to door ti lo turtein kan infuih. Engtin nge MPF hian door to door hi an phal zawk tih ka ngaihtuah ṭhin, corrupt theihna lai ber a ni. Sum lamah chuan Congress High Command lamin min rawn pek pawhin kan kîr leh ṭhin, tlem azawng erawh kan hmang. A vaia kîr ṭumte pawh kan nei a, mak an ti zawk hle a ni," a ti.

Tuikuk chungchangah Lal Thanhawla chuan, "An chhuah chhan a ho lutuk, tlanchhiatna chhan tur a awm lo. Khatih hun lai pawhin senior minister Pu Liansuama leh Pu Saikapṭhianga te kan tír a, an lo kîr duh lo. An hotute'n thil tum an neih vang a ni. Tunah hian RSS hmangin an thluak sûksak an tum niin kan hria," a ti a, RSS-te hian Mizorama Bru hruaitute pawh an koh thlak thu a sawi.

Lal Thanhawla chuan, Tripura-a awm mek Mizoram Bru-te chu Mizoramah vote nei lo mai se an duh tih sawiin, "ECI hnenah vote neihtir lo mai tur te, Kashmir Pandit anga an awmna hmuna vote neihtir mai tur te, Mizorama vote thlaktir lo turte leh kum 20 an awm tawh angin, an awmna state electoral roll-a an hming chuantir mai turtein kan thlen a ni," a ti.

Sinlung Hills Council (SHC) hruaitu zingah Mizoram electoral roll-a chuang lo an awm tih a hre lo nia sawiin Lal Thanhawla chuan, "Home Minister kutah engkim ka dah a, chanchin min hrilh loh chuan ka zawt kher lo. A mawh ka phur ngam lo tihna a ni lo a, CM ka nih angin ka mawhphurna pawh a ni ngei a, mahse, ka hriatpui lo. Home department hotute hnen­ah SHC hruaitu atana kan ruat tawh paih theih dan a awm leh awm loh zir chiang turin ka ti," a ti a; SHC hruaitute chu chi bil zawnga thil an ti a nih chuan sorkarin a enkawl loh tur thu a hrilh tih a sawi.

MLPC Act chung­changah MPCC President chuan, "Zu hi a ṭha em a, i zuar ang u ti kan ni lo. Ṭha lo rauh rauah a ziaawm dan deuh a awm em kan ti a ni. Zu khap hi a hlawhtling ngai lo. Kan khap hmasak pawhin a hlawhtlin ring lo chungin kohhran kan zah avangin kan khap. MLPC Act zir chiangtute rawt angin Excise department kan thuam chak a, police nena ṭan rual dan kan zawng. Chutiang chuan kan kal leh phawt a, a ṭha chuang lo a nih chuan kan sût leh mai ang," a ti.