Buhfai tichingpentu kum 4 chhung jail táng turin hrem
Cheng nuai 51.19 hû buhfai tichingpentu, Chawngtlai Supply Centre-a storekeeper hlui PC Vanlalruata, Khawzawl Vengthar chu Aizawl District & Session Court-a special judge Thang Lianmang Guite chuan kum 4 chhung jail-a táng tur leh Rs. 2,00,000 chawi turin a hrem.
Court order-a tarlan danin, PC Vanlalruata hi Chawngtlai Supply Centre-a storekeeper a nih laiin, August 1, 2000 aṭanga November 22, 2007 chhung khan buhfai quintal 5504.97 (cheng nuai 51.19 hu) tichingpena puh a ni a, department enquiry kalpui a ni. Supply department chuan thil thleng chungchang chu Vigilance department-ah an thlen a, Vigilance chuan Anti Corruption Bureau (ACB) chhuitir turin an ti a ni.
ACB-te'n thubuai an chhuina report leh thuhretu hrang hrangte thusawi a zir chian hnuah Special Judge chuan tun hnai khan thutlukna a siam a; PC Vanlalruata'n buhfai a tichingpen ngei tih hmuh chhuah a nih avangin, kum 4 chhung jail táng tur leh Rs. 2,00,000 chawi turin a hrem a ni. Sum chawi tur hi a pek theih loh chuan kum khat dang jail a tàn belh ang.