CEO-in Home Secretary a hêk

Mizoram chief electoral officer (CEO) SB Shashank, IAS chuan Mizoram sorkara secretary, Home leh Finance enkawl Lalnunmawia Chuaungo, IAS chu Election Commission of India (ECI) hnenah a hêk.

Thu dawn danin, Mizoram CEO hian Lalnunmawia Chuauho hi Tripura relief camp-a electoral roll revision chungchanga inrawlhah leh inthlan awm tura central armed police force chah luh an tum dodalah a puh a, sawn chhuak turin ECI a ngen. He thu ziah lai hian ECI hmalakna hriat a ni rih lo.

Election department chuan Tripura relief camp-a Bru awm, Mizoram khua leh tui dik tak an chhinchhiahte chu electoral roll-a thun an duh a, mahse, hei hi Mizoram sorkar chuan remti loin, hruai kîr hna thawhna atan chauha hman turin a ti a ni. Hemi chungchangah hian CEO SB Shashank chuan Home secretary Lalnunmawia Chuaungo chu a mawh phurtuah a puh a ni.