KHAWTHLIR

MZU-ah seminar
Mizoram University-a Department of Environmental Science leh Indian Himalayas Climate Adaptation Programme (IHCAP) chuan nimin khan MZU campus-ah nimin khan ni hnih awh tur 'Climate change: Impact, Adaptation and Response in the Eastern Himalayas’ tih seminar an buatsaih. Seminar-ah hian India ram leh Mizoram rama mithiamte'n sik leh sa inthlak danglam (climate change) chungchang an sawiho a ni.

Election training
Nimin khan GM High School, Champhaiah kumin MLA inthlan atana polling official-te pualin training buatsaih a ni a, trainee-te pualin postal ballot dilna siam niin, polling duty turte'n form 12 hmangin dilna an siam nghal. Training hi vawiinah chhunzawm a ni ang.

Zawh khap
Mamit SP chuan thupek chhuahin, Bairabi-Zamuang inkar kawnga Teirei lei chu a chak ṭha tâwk tawh lo tih a tarlang a, "Tui chîm chin a la san avang leh chhan hrang hrang vangin siamṭhat theih a la ni rih lo. Chuvangin, lirthei zawng zawngte'n an zawh/kaltlang atan a him tâwk tawh loa hriat a ni a, nunna hial chàn theihna a nih avang leh mipui tana harsatna tam tak thlen thei a nih avangin LMV chung lam lirthei tan zawh khap a ni," a ti. Thupek hian lei siamṭhat hma zawng a huam ang.

Candidate 14 zawk
Nimin November 1, 2018 Vanglaini chhuaka kumin MLA inthlan lo awm tura candidate zingah Central YMA leh MZP office bearer hlui mi 13 an awm nia tarlan chu mi 14 tih zawk tur a ni. Candidate tur pakhat hming tarlan hmaih a ni a, nmina tarlan tel loh, L Thangmawia, MZP general secretary lo ni tawh chu Lengteng bialah MNF candidate a ni dawn. Tuichang biala ding tur James Thanghmingmawia, MZP president hlui chu MNF ni loin, Congress candidate a ni dawn bawk.