Congress party-in manifesto an tlangzarh

Mizoram Pradesh Congress Committee (MPCC) chuan November 28, 2018-a Mizoram Legislative Assembly inthlana an manifesto chu nimin khan Vanapa Hall-ah an tlangzarh.

Congress party manifesto tlangzarhna inkhawm hi MPCC Campaign Committee vice chairman Lalrinmawia Ralte-in a kaihruai a; manifesto tlangzarhtu MPCC president Lal Thanhawla chuan, kum 10 an sorkar chhunga hmalakna tam tak an neihnaah kohhran leh mimal pawi an sawina leh tih dik loh an neihahte party president a nihna leh sorkar aiawhin ngaihdam a dil.

Lal Thanhawla chuan, Mizoram mamawh ang zelin Congress sorkar chu a kal ṭhin tih sawiin, "NLUP kum 10 chhung kan kalpui tawhnaah sum kawngbo sorkar angin a awm ka hre lo a, official-te'n an lo khawih bo a nih chuan kan hre lo," a ti.

NLUP sum sem tur a awm tawh lo nia Congress party aṭanga chhuak ta R Lalzirliana'n a sawi chu thu dik lo a nih thu sawiin Lal Thanhawla chuan, "NLUP atan hian cheng vaibelchhe eng emaw zat kan la dah," a ti a; NLUP chu mamawh an awm a nih chuan pek zel an tum thu a sawi.

Congress party Campaign Committee chairman Zodintluanga chuan, tuna Congress party-in MLA an neihna bialah chuan an tling leh vek dawn niin a sawi a, "MNF MLA pangate pawh hi kan chhuhsak ve dawn... MNF hi kum 2013-ah MPC nen an ṭang dûn a, MPC chu tunah chuan ZPM-ah an tel tawh. MNF hian a mal chuan Congress an hneh dawn lo tih a chiang," a ti.

Congress Manifesto point Ṭhenkhat
• HSLC leh a chung lam pass tawh, eizawnna ngêlnghet nei lo zawng zawng hnena laptop pek.
• NLUP leh NEDP sem chhunzawm
• Thingtlanga cheng mi retheite in sakna tur scheme siam.
• Mizoram State Health Care Society leh sorkar laipui health care scheme, Pradhan Mantri Jan Arogya Yojana kaihfina Rs. 5,00,000 thleng bill theihna siam.
• Natna khirh zawk tuarte'n Rs. 5,00,000 aia tam an bill theih dan tur ruahman.
• Doctor zirna ṭha ber zinga tel tura MIMER siam.
• Pianphunga rualbanlo, fahrah, hmeithai leh vanduaina tâwkte chhawmdawlna tam zawk pek.
• College leh university-a zirlaite excursion leh study tour neihna tur sum budget-a dah.
• Ruih theih thil vanga harsatna tâwkte enkawl kawnga kohhran leh tlawmngai pawlte hnathawh bakah, a enkawlna hmun rehabilitation center changtlung tak din.
• Kawlphethaa intodelhna tura hydel project siam bakah, ni zung chakna hmanga kawlphetha tam zawk siam chhuah.
• Ṭalaite tan lirthei hmanga infiamna, motor sport lama hmalak, racing track siam.
• Central sorkarin Working Journalists and Other Newspaper Employees Condition of Service Act, 1955 a siam chu Mizorama hman rei theih loh a nih avangin Mizoram journalist-te'n hamṭhatna an hmuh theihna tura dan ennawn.