ZPM Ṭhalai-in Zoramthanga an ngen
Zoram Peoples' Movement (ZPM) ṭhalaite chuan thuchhuah siamin, MNF president Zoramthanga chu thu hlui sawi tura mi cho chhuak zawngin ṭawng tawh lo se an duh thu an tarlang.
ZPM Ṭhalai chuan, Central YMA hruaitute Mizo Hnam Rûna October 30, 2018-a an lên ṭumin Zoramthanga chuan, an rammut laiin MNF president Laldenga’n candidate an neih theih lohna inthlanah inrawlh a duh ngai lo tih a sawi tih an tarlang a, "MNF-in zalênna a sual lai khan inthlanah an inrawlh ngei ṭhin a ni tih fiahna tarlan a ṭul phah a ni," an ti. ZPM Ṭhalaiin point pahnih an tarlang a, a hnuaia mite hi a ni.
1. Kum 1984-a MLA General Election kan neih dawn khan Mizo Convention Party hruaitute chu London-ah kalin, Pu Laldenga hnên aṭangin Congress party beihna atan ‘Inthlan thuchah' tape an rawn hàwn a. Pu Laldenga tape khan Congress party a tichiai hle a, an party dinhmun chhiat lai pawh a ni. Khatih laia prime minister Indira Gandhi khan Pu Lalduhoma chu London-a Pu Laldenga be tûrin a tír a, Congress chak phahna ni ta, ‘Inthlan thuchah' dang a rawn siam ta a nih kha. Hei hian an rammut laiin an candidate tel ve lohnaa an inrawlh ngeizia a tilang.
2. April 11, 1984, MLA General Election-ah N. Vanlaiphai biala PC ticket-a ding Pu Lalthawmvunga chu Mualcheng khuaa public meeting a nei tûr, thusawi tûra a ding lai chu a ngháwngah kah a ni a, a hmunah a thi nghal. Kha khan a nghawng chu, bye-election-ah pawh N.Vanlaiphai bialah PC party-in candidate dang an dah ngam loh phah ta a ni.