Nov. 5 ral hmaa chhuak turin Joint NGO-in CEO an ngen

3rd November, 2018

NGO Coordination Committee (Joint NGO) chuan, Mizoram chief electoral officer (CEO) SB Shashank-a'n November 28, 2018-a Mizoram inthlanpui neih tur a kalpui dan chu ṭha an tih loh thu an puang a; SB Shashank chu November 5, Thawhṭanni ni tlak hma ngeia inthiar fihlim a, Mizoram chhuahsan turin an chah.

YMA, MHIP, MUP, MZP leh MSU telna Joint NGO chuan nimin tlai khan Central YMA Committee Room-ah Mizoram inthlanpui awm tur leh CEO SB Shashank-a chungchang an ngaihtuah a; thuchhuah siam nghalin, "Kan hma lawk November 28, 2018-a Mizoram MLA inthlanpui awm tur atana Pu SB Shashank, IAS, CEO-in inthlan a buatsaih dan leh a kalpui dan hi ṭha a ti lo. NGO-in inthlanna him leh muanawm, zalen leh felfai tak neih a duh laiin, he lam hawi hian a kalpui lo niin a hmu a, inthlan kaihhnawih buaipui zel tlakah a ngai lo a ni," an ti.

Joint NGO hian SB Shashank chu November 5, 2018 ni tlak hma ngeiin a hna chhunzawm tawh lo a, inthiarfihlim tur leh Mizoram chhuahsan turin an ngen a; Mizoram mipuite'n inthlan buaipui tura an rin ngam ngei dah turin thuneitute an ngen tih an tarlang.

Tarlan tawh angin, chief electoral officer (CEO) SB Shashank hian October 29, 2018 khan Election Commission of India-ah lehkha thawnin, Mizoram Home secretary Lalnunmawia Chuaungo chu Mizoram inthlanna tura thil a tih danah harsatna thlentu-ah ngaiin, tuna a hna chelh mek aṭanga sawn turin a ngen.

Mizoram CEO hian Lalnunmawia Chuauho chu Tripura relief camp-a electoral roll revision chungchanga inrawlhah leh inthlan awm tura Central Armed Police Force chah luh an tum dodalah a puh. Election department chuan Tripura relief camp-a Bru awm, Mizoram khua leh tui dik tak an chhinchhiahte chu electoral roll-a thun an duh a, mahse, hei hi Mizoram sorkar chuan remti loin, hruai kîr hna thawhna atan chauha hman turin a ti thung. Hemi chungchangah hian SB Shashank chuan Lalnunmawia Chuaungo chu a mawhphurtuah a puh a ni.

Lalnunmawia Chuaungo leh SB Shashank te hi IAS ve ve an ni a, Lalnunmawia hi 1987 batch niin, SB Shashank chu 2007 batch (confer/promote) a ni thung.