Nomination a file theih tawh

November 28, 2018-a Mizoram Legislative Assembly inthlanpui awm tur atan nimin aṭang khan nomination file theih a ni. Aizawl East-I biala Zoram peo­ples' Movement (ZPM) candidate K Sap­­danga chuan nimin chaw­hma dar 11 khan nomi­nation paper thehlut nghalin, nomination a file hmasa ber a nia hriat a ni.

Nomination paper a thehluh zawha thuthar thehdarhtute zawhna chhangin ZPM leader K Sapdanga chuan, "ZPM hian sorkarna kan siam ngei kan inring. Kan zir chianna aṭanga chuan seat 25-30 inkar MLA nei thei turah kan inngai a ni," a ti.

K Sapdanga chuan, Aizawl East-I bialah a tlin theih ngei a rin thu sawiin, "Tling ngei turin nomination ka file a ni. Boruak en pawhin ka tlin ka ring. Mipuiin tactic an ngaisang tawh lo a, thil tak tak an duh tawh. Mipuiin thil lem an duh lo a, intiam vak vakte an ngaisang tawh lo," a ti a; mipuiin ram roreltu atana ṭha tur an zawng a, enchhin duh an nei nia a hriat thu a sawi.

Hriat theih chinah nimin vek khan Ser­chhipa ZPM candidate Lalduhoma, East Tui­puia MNF candidate Ramthanmawia, Cham­phai South-a ZPM can­didate C Lalrem­liana, Aizawl North I-a ZPM candidate Vanlalhlana, Tui­changa ZPM candidate W Chhuanawma, Leng­tenga ZPM candidate Ginzalal leh Champhai North-a ZPM candidate C Lalchhawnthangate pawhin nomination an file.