Inthlan hun gazette-ah chhuah
Election Commission of India (ECI) chuan The Representation of the People Act, 1951 tlawhchhanin nimin khan The Mizoram Gazette-ah Mizoram Assembly inthlan atana ni pawimawh bikte leh inthlan nía vote thlak theih hunte a chhuah a; inthlan hun November 28, 2018-ah zing dar 7 aṭanga tlai dar 4 thleng vote thlak theih a ni dawn.
Nimin vek khan ECI hnen aṭanga proceedings a hmuh angin, chief secretary Arvind Ray chuan Governor hming leh thupek angin, Indian Constitution-a Article 172(1) tlawhchhanin, tuna Mizoram Legislative Assembly ding mek chu a hun hmaa ṭhiah (dissolved) a nih loh chuan, December 15, 2018-ah a tawp dawn tih, The Mizoram Gazatte-ah a puang bawk.
Mizoram Governor chuan The Representation of the People Act, 1951 tlawhchhan leh ECI rawtna angin, Mizoram chhunga Assembly constituency zawng zawngte chu an bial chhungah ṭheuh Member of legislative Assembly (MLA) thlang turin a sáwm nghal a ni.
Inthlan atana ni pawimawhte
Nomination thehluh tawp ní - November 9, 2018
Nomination enfiah ní - November 12, 2018
Inhnuhdawh hun hnuhnung - November 14, 2018
Vote thlak hun - November 28 (7:00 a.m. - 4:00 p.m.)
Vote chhiar ní - December 11, 2018
Inthlan kaihhnawih zawhfel hun - December 13, 2018