Manifesto-ah tih theih loh tur kan dah lo - Hawla

Congress party presi­dent Lal Thanhawla chuan, MPCC Manifesto-ah an tih theih loh tur an dah lo niin a sawi a; eirukna thilah Congress kaihhruai sorkar hotute puhmawhna tur an awm lo niin a sawi bawk.

Nimina Congress Bha­van-a political session-ah thu sawiin Lal Thanhawla chuan an party manifesto chungchang a sawi a, "Manifesto hi kan tih theih ngei tura kan ngaih thil chi hrang hrangte an telh ṭhin a, kan tih theih loh tur kan telh ngai lo," a ti.

Lal Thanhawla chuan, "Kan sorkar hi kan vanneih­na em em chu, corruption chungchangah chumi kha mi chuan a eiru tia sawi tur an awm lo," a ti a; MNF an sorkar tirha an hna hmasa chu Lal Thanhawla chhui a ni tih sawiin, "Nimahsela, an hlawhchham a ni," a ti. Eptute'n NLUP an duh loh avangin Prime Minister hnenah titawp turin an hêk a, High Court-ah an khing bawk tih sawiin, chuti chung chuan NLUP chu Pathian lama ṭang policy a nih avangin lei mite'n an hneh thei lo niin a sawi.

MPCC President chuan, "Mahni chenna Chief Minister bangla rawk a, bungruate suasam a, ru duhtu hi hruaitu tlak an ni em? An chenna in an dap dawn tih an hriat lâwk hnu pawha cheng nuai 962 chuang lai man tur la neite hi ram hruaitu atan kan la duh ṭãlh dawn em ni? Dr Thangtea an tih hi sorkar hna a thawh laiin scooter nena kal ṭhin ni mah se, an sorkar chhung kum 10-ah millionaire a ni hman a, kohhran upa ni siin a campaign-naah SSA leh RMSA-te hi kan sorkar laia kan tihchhuah tiin a sawi a ni," a ti.