KHAWTHLIR

Bru-in ADC dil
Mizoram Bru Indigenous Democratic (MBID) tih pawl invuahte chuan nimin khan chief minister Lal Thanhawla hnenah lehkha thawnin, Indian Constitution-a 6th. Schedule hnuaiah Mizorama Bru-te tan autonomous district council (ADC) siam turin an ngen. MBID hian an lehkhaah hian Bru-te tana ADC pek âwm an intih chhan nia an hriat hrang hrangte an tarlang a ni.

Rui chunga lirthei khalh report theih
Traffic Police chuan thuchhuah siamin, Aizawl khawpuiah, a bikin zu leh thil dang rûi chunga lirthei khalh leh danin a phal bâk aia ring lirthei silencer hmang luite dapchhuah hna theihtawpa an chhuah mek thu an tarlang a, "Zu leh thil dang rûi chunga lirthei khalh leh lirthei ri bengchheng hmang lui, mahni veng chhung leh hmuh phâkah an awm a nih chuan Traffic Control Room telephone landline no. 0389-2313061/ 0389-2322307 leh mobile phone no. 9774440722/ 9366553559-ahte report theih a ni," an ti.

One Day Talk
ICFAI University, Mizorama Department of Commerce chuan nimin khan 'GST Concept and Application in Mizoram' tih thupui hmangin 'One Day Talk' an buatsaih a; Taxation joint commissioner HK Lalhawngliana leh assistant commissioner Hrangmawia-te resource person an ni.

Inpeih tawh
Mizoram Assembly inthlanpui atana din, Lawngtlai District Level Standing Committee chu nimin khan district bawrhsap N Chakhai hoin DC conference hall-ah an ṭhukhawm a, inthlan chungchanga hriat tur hrang hrangte an inhrilh-fiah. Meeting-a tarlan danin, Lawngtlai district chu inthlan hmachhawn turin an inpeih tawh a, a tahtawla tih tur ruahmante pawh ṭha taka hlen zel a ni.